ರಶ್ಮಿ ಪ್ರಸಾದ್ — ಪ್ರತಿಭೆಯ ಪರಿಮಳದ ಪ್ರಜ್ವಲ ಹಾದಿ

ರಶ್ಮಿ ಪ್ರಸಾದ್ — ಪ್ರತಿಭೆಯ ಪರಿಮಳದ ಪ್ರಜ್ವಲ ಹಾದಿ

ಬಹುಮುಖ ಪ್ರತಿಭೆಗಳ ಸಮಗ್ರ ರೂಪವೆಂದರೆ ರಶ್ಮಿ ಪ್ರಸಾದ್. ಅಕ್ಟೋಬರ್ 15ರಂದು ಜನಿಸಿದ ಈ ಪ್ರತಿಭಾವಂತೆಯರು ಮೂಲತಃ ತುಮಕೂರಿನವರು. ತಂದೆ ಗಿರಿರಾಜ್ ಅವರು ಕರ್ನಾಟಕ ವಿದ್ಯುಚ್ಚಕ್ತಿ ಮಂಡಲಿಯಲ್ಲಿ ಎಕ್ಸಿಕ್ಯೂಟಿವ್ ಇಂಜಿನಿಯರ್ ಆಗಿ ಸೇವೆ ಸಲ್ಲಿಸಿದ್ದರೆ, ತಾಯಿ ವಿಶಾಲ ಅವರು ಮನದಾಳದ ಮಮತೆಗಣಿಯಾಗಿದ್ದರು. ಕುಟುಂಬದ ಸಾಂಸ್ಕೃತಿಕ ವಾತಾವರಣವು ರಶ್ಮಿ ಅವರ ಬೆಳವಣಿಗೆಯಲ್ಲಿ ಪ್ರೇರಕ ಶಕ್ತಿ.

ಪ್ರತಿಭಾನ್ವಿತ ವಿದ್ಯಾರ್ಥಿನಿಯಾಗಿದ್ದ ರಶ್ಮಿ ಅವರು ಬಿ.ಎಸ್‌.ಸಿ ಹಾಗೂ ಬಿ.ಎಡ್ ಪದವಿಗಳನ್ನು ಗಳಿಸಿ, ವಿವಾಹಕ್ಕೂ ಮೊದಲು ಹೈಸ್ಕೂಲಿನಲ್ಲಿ ಉಪಾಧ್ಯಾಯಿನಿಯಾಗಿ ಸೇವೆ ಸಲ್ಲಿಸಿದರು. ಶಿಕ್ಷಣ ವೃತ್ತಿಯ ಅನುಭವವು ಅವರ ಬದುಕಿನ ದೃಷ್ಟಿಕೋನಕ್ಕೆ ಶಿಸ್ತು ಮತ್ತು ಮೌಲ್ಯಗಳನ್ನು ತುಂಬಿತು. ವಿವಾಹದ ನಂತರ ಅವರು ಚಿಂತಾಮಣಿಯಲ್ಲಿ ನೆಲೆಸಿದ್ದು, ಕುಟುಂಬದ ಜೊತೆಗೆ ಸಕ್ರಿಯ ಸಾಮಾಜಿಕ ಜೀವನವನ್ನೂ ಮುನ್ನಡೆಸುತ್ತಿದ್ದಾರೆ. ಸ್ವಯಂ ಉದ್ಯೋಗದ ಮೂಲಕ ಅನೇಕ ಮಹಿಳೆಯರಿಗೆ ಜೀವನೋಪಾಯದ ದಾರಿ ತೋರಿಸುತ್ತಿರುವುದು ಅವರ ಸಾಮಾಜಿಕ ಬದ್ಧತೆಯ ಪ್ರತೀಕ.

ಚಿಕ್ಕಂದಿನಿಂದಲೂ ಕ್ರೀಡೆ, ಸಾಹಿತ್ಯ, ಸಂಗೀತ, ನೃತ್ಯ ಹಾಗೂ ಕಲೆಗಳಲ್ಲಿ ಆಸಕ್ತಿ ತೋರಿದ ರಶ್ಮಿ ಅವರು ಪ್ರತಿಯೊಂದು ಕ್ಷೇತ್ರದಲ್ಲೂ ಮುಂಚೂಣಿಯಲ್ಲಿದ್ದರು. ಶಾಲಾ–ಕಾಲೇಜು ಸಾಂಸ್ಕೃತಿಕ ಸ್ಪರ್ಧೆಗಳಲ್ಲಿ ಅವರು ಪಡೆದ ಬಹುಮಾನಗಳು ಅವರ ಸೃಜನಾತ್ಮಕ ಸಾಮರ್ಥ್ಯದ ಸಾಕ್ಷಿ.

ಕ್ರೀಡಾ ಕ್ಷೇತ್ರದಲ್ಲಿ ಅವರು ‘ಖೋ-ಖೋ’ ಆಟದ ರಾಷ್ಟ್ರೀಯ ಮಟ್ಟದ ತಂಡದ ನಾಯಕಿಯಾಗಿದ್ದು, ಅನೇಕ ಪ್ರಶಸ್ತಿಗಳನ್ನು ಪಡೆದಿದ್ದಾರೆ. ವೀಣಾ ವಾದನದಲ್ಲಿ ವಿದುಷಿ ಶಾಂತಾ ಪುರುಷೋತ್ತಮ್ ಅವರ ಶಿಷ್ಯೆಯಾಗಿರುವ ಅವರು, ಸಂಗೀತದ ನಾದಮಯ ಲೋಕದಲ್ಲಿ ತಮ್ಮ ಗುರುತನ್ನು ಕಟ್ಟಿಕೊಂಡಿದ್ದಾರೆ. ಭರತನಾಟ್ಯವನ್ನು ವಿದ್ವಾನ್ ಶ್ರೀನಿವಾಸ ಕೊರಟಗೆರೆ ಅವರಲ್ಲಿ ಶಾಸ್ತ್ರೀಯವಾಗಿ ಕಲಿತು, ವೇದಿಕೆಯಲ್ಲಿ ಕಲೆ ಪ್ರದರ್ಶಿಸಿದ್ದಾರೆ. ಏರೋಬಿಕ್ಸ್ ಕ್ಷೇತ್ರದಲ್ಲಿಯೂ ಆಸಕ್ತಿ ಬೆಳೆಸಿಕೊಂಡಿರುವುದು ಅವರ ಚುರುಕಿನ ಜೀವನದ ಉದಾಹರಣೆ.

ಸಾಹಿತ್ಯ ಲೋಕದಲ್ಲಿಯೂ ರಶ್ಮಿ ಪ್ರಸಾದ್ ಅವರ ಹೆಸರು ವಿಶಿಷ್ಟ. ಚಿತ್ರಸಹಿತ ಕವಿತೆಗಳು, ಸಂವೇದನಾಶೀಲ ಲೇಖನಗಳು ಹಾಗೂ ಚಿಂತನಾತ್ಮಕ ಬರಹಗಳ ಮೂಲಕ ಅವರು ಓದುಗರ ಮನವನ್ನು ಗೆದ್ದಿದ್ದಾರೆ. ಅವರ ಬರಹಗಳಲ್ಲಿ ಬಣ್ಣ, ಭಾವನೆ ಮತ್ತು ಬುದ್ಧಿವಂತಿಕೆಯ ಸಮನ್ವಯ ಗೋಚರಿಸುತ್ತದೆ. ವಿವಿಧ ನಿಯತಕಾಲಿಕಗಳಲ್ಲಿ ಪ್ರಕಟವಾದ ಅವರ ಕವಿತೆಗಳು ಮತ್ತು ಲೇಖನಗಳು ವ್ಯಾಪಕ ಮೆಚ್ಚುಗೆ ಗಳಿಸಿವೆ. ಅನೇಕ ಸಂಘಟನೆಗಳಿಂದ ಪ್ರಶಂಸೆ ಹಾಗೂ ಪುರಸ್ಕಾರಗಳನ್ನು ಪಡೆದಿದ್ದಾರೆ.

ಅವರ “ಕದನ" ಎಂಬ ಕವಿತೆ ಜೀವನದ ಹೋರಾಟ, ಆತ್ಮಸಾಕ್ಷಿಯ ಬೆಳಕು ಹಾಗೂ ಅಂತರಂಗದ ಯುದ್ಧಗಳನ್ನು ಮನಮುಟ್ಟುವ ರೀತಿಯಲ್ಲಿ ಚಿತ್ರಿಸುತ್ತದೆ:

*ಬದುಕಿಗೆ ಹಾಸುಹೊದ್ದ ಬವಣೆ

ನಿಲ್ಲಿಸದೆ ಸಾಗಿಹುದು ನಿತ್ಯದ ಬೇನೆ...*

ಈ ಕವಿತೆಯಲ್ಲಿ ಕಾಣುವ ಜೀವನದ ತತ್ವಚಿಂತನೆ ಹಾಗೂ ಆತ್ಮಬಲದ ಅಭಿವ್ಯಕ್ತಿ ರಶ್ಮಿ ಅವರ ಆಂತರಿಕ ಮನೋಭಾವದ ದರ್ಶನ.

ರಶ್ಮಿ ಪ್ರಸಾದ್ ಅವರು ಕೇವಲ ಕಲಾವಿದೆ, ಸಾಹಿತ್ಯಗಾರ್ತಿ ಅಥವಾ ಕ್ರೀಡಾಳು ಮಾತ್ರ ಅಲ್ಲ — ಅವರು ಬದುಕಿನ ಪ್ರತಿಯೊಂದು ಆಯಾಮವನ್ನೂ ಸಮಚಿತ್ತದಿಂದ ಅರ್ಥೈಸಿ ಅದರಲ್ಲಿ ಸೌಂದರ್ಯ ಕಂಡುಕೊಳ್ಳುವ ವ್ಯಕ್ತಿತ್ವ. ಅವರ ಧೈರ್ಯ, ಪ್ರಾಮಾಣಿಕತೆ, ಶ್ರಮ ಹಾಗೂ ಆತ್ಮೀಯತೆ ಎಲ್ಲರಿಗೂ ಸ್ಪೂರ್ತಿ.

*(ಕೃಪೆ: ಕ ಸಂಪದ)*