ಕರ್ನಾಟಕಕ್ಕೆ ಹೆಚ್ಚುವರಿ 450 ವೈದ್ಯಕೀಯ ಸೀಟು ಲಭ್ಯ – ಸಚಿವ ಶರಣಪ್ರಕಾಶ ಪಾಟೀಲ
kkeditor
ಕರ್ನಾಟಕಕ್ಕೆ ಹೆಚ್ಚುವರಿ 450 ವೈದ್ಯಕೀಯ ಸೀಟು ಲಭ್ಯ – ಸಚಿವ ಶರಣಪ್ರಕಾಶ ಪಾಟೀಲ
ವೈದ್ಯಕೀಯ ಆಕಾಂಕ್ಷೆ ಯುವಕರಿಗೆ ಸಿಹಿ ಸುದ್ದಿ
ಬೆಂಗಳೂರು: ಸೆಪ್ಟೆಂಬರ್ 6, 2025 ರಾಜ್ಯದಲ್ಲಿ ವೈದ್ಯಕೀಯ ಶಿಕ್ಷಣಕ್ಕೆ ಮತ್ತಷ್ಟು ಉತ್ತೇಜನ ಸಿಕ್ಕಿದೆ. ಇಂದು ಬೆಂಗಳೂರಿನ ವಿಕಾಸಸೌಧದಲ್ಲಿ ಸುದ್ದಿಗೋಷ್ಠಿ ನಡೆಸಿದ ಆರೋಗ್ಯ ಮತ್ತು ವೈದ್ಯಕೀಯ ಶಿಕ್ಷಣ ಸಚಿವ ಶರಣಪ್ರಕಾಶ ಪಾಟೀಲ ಅವರು ಮಾತನಾಡಿ,
2025-26ನೇ ಸಾಲಿನ ಶೈಕ್ಷಣಿಕ ವರ್ಷಕ್ಕೆ ರಾಜ್ಯಕ್ಕೆ ಹೆಚ್ಚುವರಿಯಾಗಿ 450 ವೈದ್ಯಕೀಯ ಸೀಟುಗಳನ್ನು ರಾಷ್ಟ್ರೀಯ ವೈದ್ಯಕೀಯ ಆಯೋಗ (NMC) ಮಂಜೂರು ಮಾಡಿ ಆದೇಶ ಹೊರಡಿಸಿದೆ ಎಂದು ಘೋಷಿಸಿದರು.
ಅವರು ಮುಂದುವರೆದು, ಅನಿವಾಸಿ ಭಾರತೀಯರಿಗೆ (NRI) 15% ಕೋಟಾ ನೀಡಲಾಗಲಿದ್ದು, ಇದರ ಶುಲ್ಕವನ್ನು **₹25 ಲಕ್ಷ** ಎಂದು ನಿಗದಿಪಡಿಸಲಾಗಿದೆ ಎಂದರು.
ರಾಜ್ಯದ ಹಲವು ಸರ್ಕಾರಿ ವೈದ್ಯಕೀಯ ಕಾಲೇಜುಗಳಿಗೆ ಹೆಚ್ಚುವರಿ ಸೀಟುಗಳನ್ನು ಹಂಚಿಕೆ ಮಾಡಲಾಗಿದ್ದು, ಬೆಂಗಳೂರು, ಮೈಸೂರು, ಬೆಳಗಾವಿ, ಕಲಬುರಗಿ, ಚಿಕ್ಕಬಳ್ಳಾಪುರ, ಹಾಸನ, ರಾಯಚೂರು ಮತ್ತು ವಿಜಯನಗರ ಮೆಡಿಕಲ್ ಕಾಲೇಜುಗಳಿಗೆ ತಲಾ 50 ಸೀಟುಗಳು ಲಭ್ಯವಾಗಲಿವೆ. ಜೊತೆಗೆ ಹುಬ್ಬಳಿಯ ಮೂರು ಸಾವಿರ ಮಠದ ವೈದ್ಯಕೀಯ ಕಾಲೇಜಿಗೂ 50 ಸೀಟುಗಳು ಹೆಚ್ಚುವರಿಯಾಗಿ ನೀಡಲಾಗಿದೆ ಎಂದು ವಿವರಿಸಿದರು.
ಇದರೊಂದಿಗೆ ರಾಜ್ಯದಲ್ಲಿ ವೈದ್ಯಕೀಯ ಸೀಟುಗಳ ಸಂಖ್ಯೆ 9,263ರಿಂದ 9,663ಕ್ಕೆ ಏರಿಕೆ ಕಾಣಲಿದೆ. ದೇಶದ ಮಟ್ಟದಲ್ಲಿ ಒಟ್ಟಾರೆ 8,000 ವೈದ್ಯಕೀಯ ಸೀಟುಗಳನ್ನು ಎನ್.ಎಂ.ಸಿ. ಹೆಚ್ಚಿಸಿದ್ದು, ಇದರ ಅಂಗವಾಗಿ ಕರ್ನಾಟಕಕ್ಕೂ ಹೆಚ್ಚುವರಿ ಸೀಟು ಲಭಿಸಿದೆ.
“ದೆಹಲಿಗೆ ತೆರಳಿ ಎನ್.ಎಂ.ಸಿ. ಅಧ್ಯಕ್ಷರಾದ ಶ್ರೀ ಅಭಿಜಿತ್ ಚಂದ್ರಕಾಂತ್ ಸೇಠ್ ಅವರಿಗೆ ರಾಜ್ಯದ ಸರ್ಕಾರಿ ವೈದ್ಯಕೀಯ ಕಾಲೇಜುಗಳಿಗೆ ಹೆಚ್ಚುವರಿ ಸೀಟು ನೀಡುವಂತೆ ಪ್ರಸ್ತಾವನೆ ಸಲ್ಲಿಸಿದ್ದೆವು. ಅದರ ಫಲವಾಗಿ ಈ ಸೀಟು ಹೆಚ್ಚಳ ಸಾಧ್ಯವಾಗಿದೆ” ಎಂದು ಸಚಿವ ಶರಣಪ್ರಕಾಶ ಪಾಟೀಲ ತಿಳಿಸಿದರು.
