ಯುಗಾದಿಗೆ ವಿದ್ಯಾನಗರಕ್ಕೆ 24x7 ನೀರು ಸರಬರಾಜು: ಎಲ್ & ಟಿ ಭರವಸೆ

ಯುಗಾದಿಗೆ ವಿದ್ಯಾನಗರಕ್ಕೆ 24x7 ನೀರು ಸರಬರಾಜು: ಎಲ್ & ಟಿ ಭರವಸೆ

ಕಲಬುರಗಿ: ಎಲ್ & ಟಿ ಸಂಸ್ಥೆಯು ಯುಗಾದಿ ಹಬ್ಬದ ಸಂದರ್ಭದಲ್ಲಿ ವಿದ್ಯಾನಗರಕ್ಕೆ 24x7 ನೀರು ಸರಬರಾಜು ಪ್ರಾರಂಭಿಸುವ ಭರವಸೆ ನೀಡಿದೆ. ಎಲ್ & ಟಿ ಕಂಪನಿಯ ಜನರಲ್ ಮ್ಯಾನೇಜರ್ ಕುಮಾರಸೇನಾ ಅವರ ಪ್ರಕಾರ, ವಾರ್ಡ್ ನಂ. 32ರಲ್ಲಿ 90% ಪೈಪ್ಲೈನ್ ಕಾಮಗಾರಿ ಪೂರ್ಣಗೊಂಡಿದ್ದು, ಏಪ್ರಿಲ್ 15ರೊಳಗೆ ನೀರು ಸರಬರಾಜು ಆರಂಭಿಸುವ ಗುರಿಯಿದೆ.  

ವಾಟರ್ ಬೋರ್ಡ್ ಪೈಪ್ಲೈನ್‌ಗಳ ಅವ್ಯವಸ್ಥೆ ಹಿನ್ನೆಲೆಯಲ್ಲಿ ಎಲ್ & ಟಿ ನಿಯಂತ್ರಣಕ್ಕೆ ಬಂದ ನಂತರ ಪೈಪ್ಲೈನ್ ವ್ಯವಸ್ಥೆಯಲ್ಲಿ ಸುಧಾರಣೆ ಮಾಡಲಾಗಿದೆ. ಆದರೆ, ಮಳೆಗಾಲದಲ್ಲಿ ರಸ್ತೆಗಳು ಕೆದರಿ ಜನತೆ ತೊಂದರೆ ಅನುಭವಿಸಬೇಕಾಯಿತು. ಕಾಲೋನಿಯ ನಿವಾಸಿಗಳು ಈಗ ನಿತ್ಯ ನೀರು ಸರಬರಾಜು ಮತ್ತು ನಿಯಮಿತ ನೀರಿನ ಪೂರೈಕೆಯ ನಿರೀಕ್ಷೆಯಲ್ಲಿದ್ದಾರೆ.  

ನೀರಿನ ಸಮಸ್ಯೆಗಳ ಚರ್ಚೆ 

ವಿದ್ಯಾನಗರ ವೆಲ್ಫೇರ್ ಸೊಸೈಟಿಯ ಕಾರ್ಯದರ್ಶಿ ಶಿವರಾಜ ಅಂಡಗಿ ಅವರ ನೇತೃತ್ವದಲ್ಲಿ ನಡೆದ ಗ್ರಾಹಕರ ಸಮಾಲೋಚನಾ ಸಭೆಯಲ್ಲಿ, 8 ದಿನಕ್ಕೊಮ್ಮೆ ಮಾತ್ರ ನೀರು ಪೂರೈಕೆ ಸಮಸ್ಯೆ, ತಗ್ಗು-ಗುಂಡಿಗಳು ಸರಿಪಡಿಸದ ಸಮಸ್ಯೆ, ಮತ್ತು ಸರಿಯಾದ ನೀರಿನ ಪೂರೈಕೆ ವೇಳಾಪಟ್ಟಿಯ ಕೊರತೆಗಳ ಕುರಿತು ಚರ್ಚೆ ನಡೆಯಿತು.  

ಪಾಲಿಕೆ ಸದಸ್ಯ ಯಂಕಮ್ಮ ಜಗದೇವ ಗುತ್ತೇದಾರ, ನಾಗಭೂಷಣ ಹಿಂದೊಡ್ಡಿ ಹಾಗೂ ಇತರರು ನಿರಂತರವಾಗಿ ಎಲ್ & ಟಿ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದರು. ಎಲ್ & ಟಿ WTP ಇನ್‌ಚಾರ್ಜ್ ಅಭಿಷೇಕ ಅವರು, ನೀರಿನ ಪೂರೈಕೆಗಾಗಿ ನಿಗದಿತ ಸಮಯವನ್ನು ರೂಪಿಸುವ ಭರವಸೆ ನೀಡಿದರು. ಮೆಂಟೆನನ್ಸ್ ಇಂಜಿನಿಯರ್‌ಗಳಾದ ನಾಗೇಶ ಮತ್ತು ನಿಖಿಲ್ ಅವರು ಗ್ರಾಹಕರ ಪ್ರಶ್ನೆಗಳಿಗೆ ಸ್ಪಂದಿಸಿದರು.  

ಟ್ಯಾಂಕರ್ ಮೂಲಕ ನೀರು  

ಯುಗಾದಿ ಹಬ್ಬದ ಹೊತ್ತಿಗೆ ನೀರು ಸರಬರಾಜು ಸಾಧ್ಯವಾಗದಿದ್ದರೆ, ಟ್ಯಾಂಕರ್ ಮೂಲಕ ನೀರು ಪೂರೈಕೆ ಮಾಡಲಾಗುವುದು ಎಂದು ಎಲ್ & ಟಿ ಸೋಶಿಯಲ್ ಎಕ್ಸ್ಪರ್ಟ್ ಲಿಂಗರಾಜ ಹೀರಾ ಭರವಸೆ ನೀಡಿದರು.  

ಸಭೆಯಲ್ಲಿ ಭಾಗವಹಿಸಿದವರು 

ಸೊಸೈಟಿ ಅಧ್ಯಕ್ಷ ಮಲ್ಲಿನಾಥ ದೇಶಮುಖ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಪಂಪ್ ಆಪರೇಟರ್ ಸುಧಾಕರ, ಕಾಶೀನಾಥ ಚಿನಮಳ್ಳಿ, ಜಗದೇವ ಗುತ್ತೇದಾರ, ಗುರುಲಿಂಗಯ್ಯ ಮಠಪತಿ, ನಾಗರಾಜ ಹೆಬ್ಬಾಳ, ತರುಣಶೇಖರ ಬಿರಾದಾರ, ರಮೇಶ್ ದಸಮಾ, ಶಾಂತಯ್ಯ ಬೀದಿಮನಿ, ಉದಯಕುಮಾರ ಪಡಶೆಟ್ಟಿ, ಜಯಪ್ರಕಾಶ ಕೊಟ್ಟರಕಿ, ಶಿವರಾಜ ಪಾಟೀಲ ಮಾಡ್ಯಾಳ, ಶರಣಯ್ಯ ಮಠಪತಿ, ಮಲ್ಲಿಕಾರ್ಜುನ ಸಿಂದಗಿ ಮತ್ತು ಹಲವಾರು ನಿವಾಸಿಗಳು ಉಪಸ್ಥಿತರಿದ್ದರು.