ಹೋಗತಿ ನಕ್ಕೀ ಕೊಚ್ಚಿ

ಹೋಗತಿ ನಕ್ಕೀ ಕೊಚ್ಚಿ 

ದೇಹವೆಂಬೋದು ಮಣ್ಣಿನ ಕುಡಿಕಿ 

ದೇವ ಮಾಡ್ಯಾನ ತಿದ್ದಿ ತದಿಕಿ 

ಬಳಸಬೇಕ ಜ್ವಾಕಾಗಿ ಇದನ 

ಗಡಿಗೆ ಒಡೆದ ಮ್ಯಾಲೆ ಉಳಿಯೋದೇನ //

ಗಾಳಿ ಆಡಾಕಂತ ಒಂಬತ್ತ ಬಾಗಿಲ 

ಯಾವುದಕ್ಕೂ ಹಾಕಿಲ್ಲ ಕಡಿವಾಣ ಕೀಲ

ಎಲ್ಲಾನೂ ಬಳಸದ ಇರಾಕ ಆಗಾಕಿಲ್ಲ 

ನೀತಿ ತಪ್ಪಿದರ ಹಾಳಾಗದೆ ಇರದಲ್ಲ ಕೇಳ ,//

ಎಲುಬಿನ ಹಂದರಕ ತೊಗಲಿನ ಹೊದಿಕಿ 

ಹುಡುಕಿದರೆನಿಲ್ಲ ಬೆದಕಿ ಬೆದಕಿ 

ಆಸೆ ಹಂಬಲಗಳು ಹಾಕತಾವ ಇಣಿಕಿ 

ಮನಸ ಮಾತ ಕೇಳಿದರ ಬಾಳ ಗೋಳ ಐತಿ //

ನಾಶವಾಗೋ ಈ ದೇಹಾ ನೆಚ್ಚಿ 

ಕಾಣುವುದೆಲ್ಲಾ ಸುಖ ಕೊಡತೈತಿ ಅಂತ ಮೆಚ್ಚಿ 

ಬೆನ್ನತ್ತಿ ತಿರುಗಿದರ ಆಗತಿ ನೀ ಹುಚ್ಚಿ 

ಹಾಳು ಸಂಸಾರದಾಗ ಹೋಗುತೀ ನಕ್ಕೀ ಕೊಚ್ಚಿ//

ನಿನ್ನ ನೀ ತಿಳಿದ ನೋಡದೇನಿಲ್ಲ ಒಳಗ 

ಯಾರಿಲ್ಲ ಇಲ್ಲಿ ಸ್ಥಿರವಾದ ಬಂಧು ಬಳಗ 

ಬಂದು ಹೋಗೋ ನೆಂಟರೆ ಎಲ್ಲಾ 

ಇಲ್ಲಿ ಉಳಿದೊರು ಯಾರೂ ಇಲ್ಲ//

ಗುಡಿ ಗುಂಡಾರ ಸುತ್ತಿ ದನಿದರೇನ

ಅಡಿಗಡಿಗೆ ಶಿವನ ನೆನೆಯದಿರೇನಿಲ್ಲ 

ಮುಡಿಕೊಟ್ಟು ಮಡಿಯಾಗಿ ನಿಂತರೇನ 

ನಿಜ ಬಕುತಿ ತೋರದ ಅಂವ ಒಲಿದಾನೇನ//

ಡಾ ಅನ್ನಪೂರ್ಣ ಹಿರೇಮಠ