ಓಡಿಹೋದಾಕಿ – ಸಂಕಷ್ಟದ ನಡುವೆಯೂ ಘನತೆ ಉಳಿಸಿದ ಹೆಣ್ಣುಮನಸ್ಸಿನ ದಿಗಂತ
kkeditor
ಓಡಿಹೋದಾಕಿ – ಸಂಕಷ್ಟದ ನಡುವೆಯೂ ಘನತೆ ಉಳಿಸಿದ ಹೆಣ್ಣುಮನಸ್ಸಿನ ದಿಗಂತ
ವಿಮರ್ಶೆ: ಓಂಕಾರ ಪಾಟೀಲ, ಕಾರ್ಯದರ್ಶಿಗಳು, ಜಿಲ್ಲಾ ಮಕ್ಕಳ ಸಾಹಿತ್ಯ ಪರಿಷತ್, ಬೀದರ
ಮೊಬೈಲ್: 6360413933,
ಬೆಲೆ ೨೧೫,,ವೀರಲೋಕ ಬುಕ್ಸ್ ಪ್ರೈವೇಟ್ ಲಿಮಿಟೆಡ್ ಪ್ರಕಟಿಸಿದ "ಓಡಿಹೋದಾಕಿ" ಕಾದಂಬರಿಯು, ಹರೆಯದ ವಯಸ್ಸಿನಲ್ಲಿ ವಿಧವೆಯಾಗಿದ ಅಂತರಾಳದಿಂದ ಆರಂಭವಾಗಿ, ತನ್ನ ಬದುಕಿನಲ್ಲಿ ಹೊಸ ಅರ್ಥ ಹುಡುಕುವ ಹೆಣ್ಣುಮಗಳ ಹೃದಯವಿದ್ರಾವಕ ಪ್ರಯಾಣವನ್ನೇ ಓದುಗರ ಮುಂದೆ ಇಡುತ್ತದೆ. ಲೇಖಕಿ ಶ್ರೀಮತಿ ಪಾರ್ವತಿ.ವಿ.ಸೋನಾರೆ ಅವರು ಸಮಾಜದ ನಿಷ್ಪಕ್ಷಪಾತ ಕಣ್ಣಾಗಿ, ಹೆಣ್ಣುಮಕ್ಕಳ ಬದುಕಿನ ನೋವು, ಶೋಷಣೆ ಮತ್ತು ಅವರ ಆತ್ಮದ ಇಳಿಜಾರಿನ ನೈಸರ್ಗಿಕ ಚಿತ್ರಣವನ್ನು ತಮ್ಮ ಬರಹದ ಮೂಲಕ ವಿಶಿಷ್ಟವಾಗಿ ಮೂಡಿಸಿದ್ದಾರೆ.
ವಿಧವೆಯಾದ ನರಸವ್ವ ಎಂಬ ಹೆಣ್ಣುಮಗ ತನ್ನ ಜೀವನದ ಅಂಧಕಾರದ ದಾರಿಯಲ್ಲಿ ನಿರೀಕ್ಷೆಗಳ ಬೆಳಕು ಹುಡುಕಲು ಮಾಡುವ ಪ್ರಯತ್ನವೇ ಈ ಕಾದಂಬರಿಯ ದಾರಿದೀಪ. ಅಪ್ಪತಪ್ಪಾಗಿ ಗುಮ್ಮಟನನ್ನು ನಂಬಿ ಓಡಿದ ಅವಳ ಬದುಕು ಹೇಗೆ ನರಕವಾಯಿತು ಎಂಬುದು ಬರವಣಿಗೆಯಲ್ಲಿ ಮನಮೋಹಕವಾಗಿ ಬಿಂಬಿತವಾಗಿದೆ. ಅವಳ ಮಕ್ಕಳು ರಾಮು, ಭೀಮು ಮತ್ತು ಅಕ್ಕ - ಇವರು ತಮ್ಮದೇ ಆದ ದಿಕ್ಕಿನಲ್ಲಿ ಬೆಳೆಯುವ ಮೂಲಕ ಜೀವನದ ಸಂಕೀರ್ಣತೆಯನ್ನು ಪರಿಹರಿಸುತ್ತಾ ಸಾಗುತ್ತಾರೆ.
ಕಾದಂಬರಿಯ ಶ್ರೇಷ್ಠತೆ ಎಂದರೆ, ಇದು ಕೇವಲ ನೊಂದು ಕಳವಳಿಸುವ ಕಥೆಯಷ್ಟಲ್ಲ, ಇದು ಹೆಣ್ಣಿನ ಪರ ಧ್ವನಿ, ಪ್ರತಿ ಹೆಣ್ಣಿನ ಬದುಕಿನಲ್ಲಿ ಮನೆಮಾಡಿರುವ ಕನಸುಗಳ ನೆನೆಪಿಗೆ ಪಾಠ ನೀಡುವ ಕೃತಿಯಾಗಿದೆ. ಅಂತಿಮದ ವರ್ತಮಾನದ ಘಟ್ಟದಲ್ಲಿ, ಭೀಮ್ಯಾ ತನ್ನ ತಾಯಿಯನ್ನು ಮರಳಿ ಊರಿಗೆ ಕರೆತರುವುದು, ಹೆಣ್ಣುಮಗನ ಬಾಳಿಗೆ ಗೌರವ ನೀಡುವುದು, ಇವೆಲ್ಲವೂ ಒಂದು ಸಾಮಾಜಿಕ ಸಂದೇಶವನ್ನೂ ಇಡುತ್ತದೆ – "ಹೆಣ್ಣು ಒಂದು ಸಮಾಜದ ಕಣ್ಣು" ಎಂಬಂತೆ.
ಈ ಕೃತಿಯಲ್ಲಿ ಬಾಲಗಾಂವಿ ಮತ್ತು ಹಳ್ಳಿ ಎಂಬ ಊರುಗಳ ಗ್ರಾಮೀಣ ಶೈಲಿ, ಭಾಷಾ ಸೌಂದರ್ಯ ಹಾಗೂ ಸ್ಥಳೀಯ ವಾತಾವರಣವನ್ನು ಸಹ ಜೀವಂತವಾಗಿ ಬಳಸಲಾಗಿದೆ. ವಾಸ್ತವತೆಗೆ ತಕ್ಕಂತಹ ಭಾಷೆ, ಸಂವೇದನಾಶೀಲ ಪ್ರಸಂಗಗಳು, ಮನುಷ್ಯ ಸಂಬಂಧಗಳ ವ್ಯಾಖ್ಯಾನ ಮತ್ತು ಮಾನವೀಯತೆಯ ತಾತ್ವಿಕ ಬಿಂಬಗಳನ್ನು ಈ ಕಾದಂಬರಿ ಒಳಗೊಂಡಿದೆ.
ಲೇಖಕಿ ಶ್ರೀಮತಿ ಪಾರ್ವತಿ ಸೋನಾರೆಯವರು ಈ ಹಿಂದೆ "ನಾವಿಬ್ಬರು" ಕವನ ಸಂಕಲನ, "ಭವರಿ" ಕಥಾ ಸಂಕಲನ, "ಅಪ್ಪನೊಳಗೊಬ್ಬ ಅವ್ವ" ಇತ್ಯಾದಿ ಕೃತಿಗಳ ಮೂಲಕ ತಮ್ಮನ್ನು ಸಾಹಿತ್ಯ ಲೋಕದಲ್ಲಿ ಸಾಬೀತು ಮಾಡಿದ್ದರೆ, *"ಓಡಿಹೋದಾಕಿ"* ಕಾದಂಬರಿಯ ಮೂಲಕ ಅವರು ಪ್ರಬುದ್ಧ ಕಾದಂಬರಿಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಈ ಕೃತಿಯು ಪ್ರಸ್ತುತ ಸಾಮಾಜಿಕ ವ್ಯವಸ್ತೆಯ ಮೇಲೆ ಪ್ರಭಾವ ಬೀರಬಲ್ಲಷ್ಟು ಶಕ್ತಿಯುಕ್ತ ಬರವಣಿಗೆ. ಓದುಗರಿಗೆ ಅಂತರಂಗ ತೋರುವ, , ಆತ್ಮಾನ್ವೇಷಣೆಗೆ ದಾರಿ ತೋರಿಸುವ ಉತ್ಕೃಷ್ಟ ಕಥನ.
