ಆಸ್ತಿ ವಿವರ ಬಹಿರಂಗ – ಸುಪ್ರೀಂ ಕೋರ್ಟ್‌ನ ದಿಟ್ಟ ಹೆಜ್ಜೆ! ನ್ಯಾಯಾಂಗ ಪಾರದರ್ಶಕತೆಗೆ ಹೊಸ ದಿಕ್ಕು

ಆಸ್ತಿ ವಿವರ ಬಹಿರಂಗ – ಸುಪ್ರೀಂ ಕೋರ್ಟ್‌ನ ದಿಟ್ಟ ಹೆಜ್ಜೆ!  

ನ್ಯಾಯಾಂಗ ಪಾರದರ್ಶಕತೆಗೆ ಹೊಸ ದಿಕ್ಕು

“ಭ್ರಷ್ಟಾಚಾರಕ್ಕೆ ವಿರಾಮ – ಪಾರದರ್ಶಕತೆಗೆ ಪಥವಾಚನೆ” ಎನ್ನುವ ಹಾದಿಯಲ್ಲಿ ಸರ್ವೋಚ್ಚ ನ್ಯಾಯಾಲಯ ಮಹತ್ವದ ಹೆಜ್ಜೆ ಹಾಕಿದೆ. ಈಗಾಗಲೇ ಜನಪ್ರತಿನಿಧರು, ಆಡಳಿತ ಯಂತ್ರದ ಅಧಿಕಾರಿಗಳು ಪ್ರತಿವರ್ಷ ಆಸ್ತಿ ವಿವರ ಸಲ್ಲಿಸುತ್ತಿರುವಂತೆಯೇ, ಸುಪ್ರೀಂ ಕೋರ್ಟ್‌ನ 33 ಹಾಲಿ ನ್ಯಾಯಮೂರ್ತಿಗಳು ತಮ್ಮ ಆಸ್ತಿ ವಿವರಗಳನ್ನು ಸಾರ್ವಜನಿಕವಾಗಿ ಪ್ರಕಟಿಸಿದ್ದಾರೆ. ಇದು ನ್ಯಾಯಾಂಗ ಪಾರದರ್ಶಕತೆಗೆ ನವ ದಿಕ್ಕು ತೋರಿಸಿದಂತೆ ಭಾಸವಾಗುತ್ತಿದೆ.

ವಿವೇಚನೆಯಿಂದ ಕಡ್ಡಾಯತೆ ಕಡೆಗೆ

ಹಿಂದಿನ ದಿನಗಳಲ್ಲಿ ಸುಪ್ರೀಂ ಕೋರ್ಟ್‌ನ ನ್ಯಾಯಮೂರ್ತಿಗಳು ತಮ್ಮ ಆಸ್ತಿ ವಿವರಗಳನ್ನು ಪ್ರಧಾನ ನ್ಯಾಯಮೂರ್ತಿಗೆ ಖಾಸಗಿ ರೂಪದಲ್ಲಿ ಸಲ್ಲಿಸುತ್ತಿದ್ದರು. ಆದರೆ 2009ರ ಪೂರ್ಣಪೀಠದ ನಿರ್ಣಯದಂತೆ ವೆಬ್‌ಸೈಟ್‌ನಲ್ಲಿ ಬಹಿರಂಗಪಡಿಸಲು ತೀರ್ಮಾನಿಸಿದರೂ, ಅದು ವಿಳಂಬಕ್ಕೀಡಾಗಿತ್ತು. ಈಗ ಮಾತ್ರ ನ್ಯಾಯಮೂರ್ತಿ ವರ್ಮ ನಿವಾಸದ ಪ್ರಕರಣದ ನಂತರ, ಈ ನಿರ್ಣಯ ಕಾರ್ಯರೂಪಕ್ಕೆ ಬಂದಿದೆ.

ಹೈಕೋರ್ಟ್‌ಗಳು ಹಿಂಜರಿಕೆ!  

ದೇಶದ 25 ಹೈಕೋರ್ಟ್‌ಗಳಲ್ಲಿ 770 ನ್ಯಾಯಮೂರ್ತಿಗಳಿದ್ದು, ಕೇವಲ ಶೇ.13ರಷ್ಟು (97 ನ್ಯಾಯಮೂರ್ತಿಗಳು ಮಾತ್ರ) ಆಸ್ತಿ ವಿವರಗಳನ್ನು ಬಹಿರಂಗಪಡಿಸಿದ್ದಾರೆ. ಈ ಪೈಕಿ ಕೆಲವು ಹೈಕೋರ್ಟ್‌ಗಳು ಈ ಮಾಹಿತಿಯನ್ನು ಆರ್‌ಟಿಐ ಅಡಿಯಲ್ಲಿ ನೀಡಲು ನಿರಾಕರಿಸುತ್ತಿವೆ. ಇದು ನ್ಯಾಯಾಂಗದ ಒಳಗೆ ಇನ್ನೂ ಪಾರದರ್ಶಕತೆಯ ಕೊರತೆ ಇರುವುದನ್ನು ತೋರುತ್ತದೆ.

ಪಾರದರ್ಶಕತೆಗೆ ನಂಬಿಕೆ ಬೆಳೆಸೋಣ

"ಸಕಲ ಪ್ರಜಾಪ್ರಭುತ್ವ ಅಂಗಗಳಲ್ಲಿಯೂ ಭ್ರಷ್ಟಾಚಾರದ ಹಾನಿ ಇರುವಂತೆಯೇ, ನ್ಯಾಯಾಂಗವೂ ಹೊರತಲ್ಲ. ಆದರೆ ಇನ್ನೂ ಹೆಚ್ಚು ನಂಬಿಕೆ ಉಳಿದಿರುವ ಕ್ಷೇತ್ರವೇ ನ್ಯಾಯಾಂಗ. ಅದನ್ನು ಉಳಿಸಿಕೊಳ್ಳುವುದು ನಮ್ಮ ಜವಾಬ್ದಾರಿ" ಎಂದು ನಿವೃತ್ತ ನ್ಯಾಯಮೂರ್ತಿಯೊಬ್ಬರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಮಾದರಿಯಾದ ಸುಪ್ರೀಂ ಕೋರ್ಟ್

ಸುಪ್ರೀಂ ಕೋರ್ಟ್ ಕೈಗೊಂಡಿರುವ ಈ ದಿಟ್ಟ ನಿರ್ಣಯ ನ್ಯಾಯಾಂಗದ ನೈತಿಕತೆಗೆ ಹೊಸ ಬೆಳಕು. ಇನ್ನು ಹೈಕೋರ್ಟ್‌ಗಳಿಗೂ ಇದೇ ದಾರಿ ಹಿಡಿಯುವ ಸಮಯ ಬಂದಿದೆ. ನ್ಯಾಯಮೂರ್ತಿಗಳ ಆಸ್ತಿ ವಿವರ ಬಹಿರಂಗವೇ ನಂಬಿಕೆಯ ನವ ತಂತ್ರವೋ?

– ಎನ್.ಸಿ. ಶ್ರೀನಿವಾಸ,  ನಿವೃತ್ತ ಮುಖ್ಯ ಮಾಹಿತಿ ಆಯುಕ್ತರು