ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಹೈದರಾಬಾದ್ ಕರ್ನಾಟಕ ಶಿಕ್ಷಣ ಸಂಸ್ಥೆಯ ವೈದ್ಯರ ಸಂಶೋಧನೆಯ ಖ್ಯಾತಿ*

*ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಹೈದರಾಬಾದ್ ಕರ್ನಾಟಕ ಶಿಕ್ಷಣ ಸಂಸ್ಥೆಯ ವೈದ್ಯರ ಸಂಶೋಧನೆಯ ಖ್ಯಾತಿ*

ಕಲಬುರ್ಗಿ: ಕಲ್ಯಾಣ ಕರ್ನಾಟಕದ ಹೆಮ್ಮೆಯ ತಾಣವಾದ ಕಲಬುರ್ಗಿಯ ವೈದ್ಯಕೀಯ ಕ್ಷೇತ್ರವು ಜಾಗತಿಕ ವೇದಿಕೆಯಲ್ಲಿ ತನ್ನದೆಯಾದ ಖ್ಯಾತಿಯನ್ನು ಹೊಂದಿದೆ. ಇಲ್ಲಿನ ಹೈದರಾಬಾದ್ ಕರ್ನಾಟಕ ಶಿಕ್ಷಣ ಸಂಸ್ಥೆಯ ಸಂಸ್ಥೆಯ ಎಸ್. ನಿಜಲಿಂಗಪ್ಪ ದಂತ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆಯ ಮ್ಯಾಕ್ಸಿಲೋಫೇಶಿಯಲ್ (ಬಾಯಿ ಮತ್ತು ಮುಖ) ಶಸ್ತ್ರಚಿಕಿತ್ಸಾ ವಿಭಾಗದ ಪ್ರಾಧ್ಯಾಪಕರೂ, ವಿಭಾಗಾಧ್ಯಕ್ಷರೂ ಆದ ಡಾ. ಉಡುಪಿಕೃಷ್ಣ ಜೋಶಿ ಅವರು, 2025ರ ಮೇ 22ರಿಂದ 25ರವರೆಗೆ ಸಿಂಗಾಪುರದಲ್ಲಿ ನಡೆದ 26ನೇ ಅಂತರರಾಷ್ಟ್ರೀಯ ಮ್ಯಾಕ್ಸಿಲೋಫೇಶಿಯಲ್ (ಬಾಯಿ ಮತ್ತು ಮುಖ) ಶಸ್ತ್ರಚಿಕಿತ್ಸಾ ಸಮ್ಮೇಳನದಲ್ಲಿ (ಐಕಾಮ್ಸ್ 2025) ಮೂರು ಸಂಶೋಧನಾ ಪ್ರಬಂಧಗಳನ್ನು ಯಶಸ್ವಿಯಾಗಿ ಮಂಡಿಸಿ, ಕಲಬುರ್ಗಿಗೆ ಜಾಗತಿಕ ಮಟ್ಟದಲ್ಲಿ ಮನ್ನಣೆ ತಂದಿದ್ದಾರೆ. ಈ ಪ್ರಬಂಧಗಳು ಕಠಿಣವಾದ ಸಮೀಕ್ಷೆಗೆ ಒಳಪಟ್ಟು ಆಯ್ಕೆಯಾಗಿದ್ದು, ವಿಶ್ವದಾದ್ಯಂತ ಕೆಲವೇ ಆಯ್ದ ಸಂಶೋಧಕರಿಗೆ ಮಾತ್ರ ಲಭಿಸುವ ಪ್ರಭಂದ ಮಂಡನೆಯ ಅವಕಾಶವನ್ನು ಇವರು ಗಳಿಸಿದ್ದಾರೆ. ಕಲಬುರ್ಗಿಯಿಂದ ದಂತ ವೈದ್ಯಕೀಯ ಕ್ಷೇತ್ರದಲ್ಲಿ ಇಂತಹ ಅಪರೂಪದ ಗೌರವಕ್ಕೆ ಡಾ. ಜೋಶಿ ಪಾತ್ರರಾಗಿದ್ದಾರೆ.

ವಿಶ್ವದ 180 ದೇಶಗಳ ಪ್ರತಿನಿಧಿಗಳು ಈ ಸಮ್ಮೇಳನದಲ್ಲಿ ಭಾಗವಹಿದ್ದರು. ಈ ಸಮ್ಮೇಳನವು ಡಾ. ಜೋಶಿ ಅವರಿಗೆ ಕಲಬುರ್ಗಿಯ ಅತ್ಯಾಧುನಿಕ ಸಂಶೋಧನೆಯನ್ನು ಜಾಗತಿಕ ಮಟ್ಟದಲ್ಲಿ ಬೆಳಕಿಗೆ ತರುವ ಅಪೂರ್ವ ಸಂದರ್ಭವನ್ನು ಒದಗಿಸಿತ್ತು. ಅವರ ಪ್ರಬಂಧಗಳು ಬಾಯಿ ಮತ್ತು ಮುಖ ಶಸ್ತ್ರಚಿಕಿತ್ಸೆಯ ವೈವಿಧ್ಯಮಯ ಕ್ಷೇತ್ರಗಳನ್ನು ಒಳಗೊಂಡಿದ್ದು, ಸಂಸ್ಥೆಯ ವೈದ್ಯಕೀಯ ವಿಜ್ಞಾನದ ಪ್ರಗತಿಗೆ ಇರುವ ದೃಢ ಸಂಕಲ್ಪವನ್ನು ಎತ್ತಿ ತೋರಿವೆ.

ಡಾ. ಜೋಶಿ ಅವರ ಸಂಶೋಧನಾ ಮಂಡಿಸಿದ ಪ್ರಬಂಧಗಳಲ್ಲಿ "ಪೋಸ್ಟ್ ಟ್ರಾಮ್ಯಾಟಿಕ್ ಟ್ರಿಸ್ಮಸ್‌ ಮ್ಯಾಟ್ರಿಕ್ಸ್ ರಿದಮ್ ಚಿಕಿತ್ಸೆಯ ಪರಿಣಾಮಕಾರಿತ್ವ" ಎಂಬ ಅಧ್ಯಯನವು ಅಂತರರಾಷ್ಟ್ರೀಯ ವೈದ್ಯಕೀಯ ಸಮುದಾಯದ ಗಮನವನ್ನು ಸೆಳೆಯಿತು. ಆಘಾತದಿಂದಾಗುವ ದವಡೆಯ ಚಲನೆಯ ಅಡಚಣೆಗಳಿಗೆ ಹೊಸ ಚಿಕಿತ್ಸಾ ಪದ್ಧತಿಗಳನ್ನು ಈ ಸಂಶೋಧನೆಯು ಪರಿಶೀಲಿಸಿದೆ. ಅವರ ಎರಡನೇ ಪ್ರಮುಖ ಪ್ರಬಂಧವಾದ "ಮುಖದ ಮಧ್ಯಭಾಗದ ಅಘಾತಕಾರಿ ವಿಘಟನೆಯ ನಿರ್ವಹಣೆ - ಒಂದು ಸವಾಲು" ಎಂಬುದು ಸಂಕೀರ್ಣ ಮುಖದ ಗಾಯಗಳ ಚಿಕಿತ್ಸೆಯಲ್ಲಿ ಅಳವಡಿಸಬಹುದಾದ ಅತ್ಯಾಧುನಿಕ ಶಸ್ತ್ರಚಿಕಿತ್ಸಾ ತಂತ್ರಗಳನ್ನು ವಿವರಿಸಿದೆ. ಅವರ ಮೂರನೇ ಸಂಶೋಧನಾ ಕಾರ್ಯವು ಮುಖದ ಆಘಾತ ಚಿಕಿತ್ಸೆಯಲ್ಲಿನ ಅತ್ಯಾಧುನಿಕ ಶಸ್ತ್ರಚಿಕಿತ್ಸಾ ವಿಧಾನಗಳ ಮೇಲೆ ಆಧಾರಿತವಾಗಿದ್ದು, ಇದು ಗಂಭೀರ ಮುಖದ ಗಾಯಗಳ ಆರೈಕೆಯಲ್ಲಿ ಹೊಸ ಮಾರ್ಗದರ್ಶಿ ತತ್ವಗಳನ್ನು ಮಂಡಿಸಿದೆ.

ಹೈದರಾಬಾದ್ ಕರ್ನಾಟಕ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷರು ಹಾಗೂ ವಿಧಾನ ಪರಿಷತ್ತಿನ ಸದಸ್ಯರಾದ ಶಶೀಲ್ ಜಿ ನಮೋಶಿ, ಉಪಾದ್ಯಕ್ಷರಾದ ರಾಜಾ ಭಿ ಭೀಮಳ್ಳಿ , ಕಾರ್ಯದರ್ಶಿಗಳಾದ ಉದಯಕುಮಾರ್ ಚಿಂಚೋಳಿ ಜಂಟಿ ಕಾರ್ಯದರ್ಶಿಗಳಾದ ಡಾ ಕೈಲಾಸ ಪಾಟೀಲ್ ದಂತ ವೈದ್ಯಕೀಯ ಕಾಲೇಜಿನ ಸಂಯೋಜಕರಾದ ಡಾ ಅನಿಲಕುಮಾರ ಪಟ್ಟಣ ಹಾಗೂ ಎಲ್ಲ ಆಡಳಿತ ಮಂಡಳಿ ಸದಸ್ಯರು ಪ್ರಾಂಶುಪಾಲರಾದ ಡಾ. ಜಯಶ್ರೀ ಮುದ್ದ ಅವರು ಡಾ. ಜೋಶಿ ಅವರ ಈ ಅತ್ಯುನ್ನತ ಸಾಧನೆಗೆ ತಮ್ಮ ಅಭಿನಂದನೆಗಳನ್ನು ತಿಳಿಸಿದ್ದಾರೆ. ಈ ಜಾಗತಿಕ ಮನ್ನಣೆಯು ದಂತ ಶಿಕ್ಷಣ ಮತ್ತು ನಂಶೋಧನೆಯಲ್ಲಿ ನಮ್ಮ ಸಂಸ್ಥೆಯ ಉತ್ತರೋತ್ತರ ಯಶಸ್ಸಿಗೆ ಸ್ಪಷ್ಟ ಸಾಕ್ಷಿಯಾಗಿದೆ ಎಂದು ಅವರು ಹೆಮ್ಮೆಯಿಂದ ನುಡಿದಿದ್ದಾರೆ.

ಸಂಸ್ಥೆಯ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳು ಡಾ. ಜೋಶಿ ಅವರ ಆಗಮನವನ್ನು ಹೃದಯಪೂರ್ವಕವಾಗಿ ಸ್ವಾಗತಿಸಿದ್ದಾರೆ. ಅವರ ಈ ಅಂತರರಾಷ್ಟ್ರೀಯ ಖ್ಯಾತಿಯ ಪ್ರಬಂಧಗಳು ಮ್ಯಾಕ್ಸಿಲೋಫೇಶಿಯಲ್ ಶಸ್ತ್ರಚಿಕಿತ್ಸೆಯ ಕ್ಷೇತ್ರದಲ್ಲಿ ಶೈಕ್ಷಣಿಕ ಶ್ರೇಷ್ಠತೆ ಮತ್ತು ಸಂಶೋಧನೆಗೆ ಪ್ರೇರಣೆಯಾಗಿವೆ.

ಈ ಮನ್ನಣೆಯು ಕಲಬುರ್ಗಿಯನ್ನು ಮತ್ತು ಎಸ್ ನಿಜಲಿಂಗಪ್ಪ ಸಂಸ್ಥೆಯನ್ನು ದಂತ ಸಂಶೋಧನೆ ಹಾಗೂ ವೈದ್ಯಕೀಯ ಶಿಕ್ಷಣದ ಜಾಗತಿಕ ವೇದಿಕೆಯಲ್ಲಿ ಗಟ್ಟಿಯಾಗಿ ನಿಲ್ಲಿಸಿದೆ. ಇದು ಹೈದರಾಬಾದ್ ಕರ್ನಾಟಕ ಶಿಕ್ಷಣ ಸಂಸ್ಥೆಯ ಎಲ್ಲರಿಗೂ ಹೆಮ್ಮೆಯ ಮತ್ತು ಸಂತೋಷದ ಕ್ಷಣವಾಗಿದೆ.

ಈರನಗೌಡ ಕೆ ಪಾಟೀಲ್ ಸಂಯೋಜಕ ಹೈ ಕ ಶಿಕ್ಷಣ ಸಂಸ್ಥೆ ಕಲಬುರಗಿ