ವಿ.ಜಿ. ಮಹಿಳಾ ಮಹಾವಿದ್ಯಾಲಯದಲ್ಲಿ ವಿಶ್ವ ಸ್ತನ್ಯಪಾನ ಸಪ್ತಾಹ ಆಚರಣೆ
kkeditor
ವಿ.ಜಿ. ಮಹಿಳಾ ಮಹಾವಿದ್ಯಾಲಯದಲ್ಲಿ ವಿಶ್ವ ಸ್ತನ್ಯಪಾನ ಸಪ್ತಾಹ ಆಚರಣೆ
ಕಲಬುರಗಿ, ಆ. 7: ವಿಶ್ವ ಸ್ತನ್ಯಪಾನ ಸಪ್ತಾಹದ ಅಂಗವಾಗಿ ವಿ.ಜಿ. ಮಹಿಳಾ ಮಹಾವಿದ್ಯಾಲಯದ ಕ್ಲಿನಿಕಲ್ ನ್ಯೂಟ್ರಿಷನ್ ಮತ್ತು ಡಯಟೆಟಿಕ್ಸ್ ವಿಭಾಗವು ನ್ಯೂಟ್ರಿಷನ್ ಸೊಸೈಟಿ ಆಫ್ ಇಂಡಿಯಾ, ಗುಲಬರ್ಗಾ ಚಾಪ್ಟರ್ ಸಹಯೋಗದಲ್ಲಿ ತಾಯಿಯ ಹಾಲಿನ ಮಹತ್ವ ಕುರಿತು ವಿಶೇಷ ಉಪನ್ಯಾಸ ಹಾಗೂ ಆರೋಗ್ಯಕರ ಪಾಕವಿಧಾನ ಸ್ಪರ್ಧೆಯನ್ನು ಆಯೋಜಿಸಿತು.
ಕಾರ್ಯಕ್ರಮವು ಸಸಿಗೆ ನೀರೆರೆಯುವ ಮೂಲಕ ಆರಂಭಗೊಂಡಿತು. ಬಳಿಕ ಕುಮಾರಿ ಮುಸ್ತೈನಾ ಅವರು ಸ್ವಾಗತ ಭಾಷಣ ಮಾಡಿದರು. ಶ್ರೀಮತಿ ರೇಖಾ ಪಾಟೀಲ ಅವರು ಮುಖ್ಯ ಅತಿಥಿಗಳಾದ ಡಾ. ಪ್ರೀತಿ ಚಿಂಚೋಳಿ ಅವರನ್ನು ಪರಿಚಯಿಸಿದರು.
ಮುಖ್ಯ ಅತಿಥಿಗಳಾದ ಡಾ. ಪ್ರೀತಿ ಚಿಂಚೋಳಿ ಅವರು ತಾಯಿಯ ಹಾಲಿನ ಮಹತ್ವ, ಶಿಶುವಿನ ಆರೋಗ್ಯ ಮತ್ತು ಬೆಳವಣಿಗೆಯಲ್ಲಿ ಅದರ ಪಾತ್ರ ಹಾಗೂ ಬಾಟಲಿ ಹಾಲಿನ ದುಷ್ಪರಿಣಾಮಗಳ ಕುರಿತು ವಿದ್ಯಾರ್ಥಿನಿಯರಿಗೆ ಮಾಹಿತಿ ನೀಡಿದರು. "ಬಾಟಲಿ ಹಾಲು ಮಗುವಿನ ಹೊಟ್ಟೆಯನ್ನು ತುಂಬುತ್ತದೆ; ಆದರೆ ತಾಯಿಯ ಹಾಲು ಮಗುವಿನ ಆತ್ಮವನ್ನು ಪೋಷಿಸುತ್ತದೆ" ಎಂಬ ಮಾತಿನ ಮೂಲಕ ಸ್ತನ್ಯಪಾನದ ಮಹತ್ವವನ್ನು ಮನದಟ್ಟಾಗಿಸಿದರು.
ಉಪನ್ಯಾಸದ ನಂತರ ಹಾಲುಣಿಸುವ ತಾಯಂದಿರಿಗಾಗಿ ಆರೋಗ್ಯಕರ ಪಾಕವಿಧಾನಗಳ ಸ್ಪರ್ಧೆಯನ್ನು ಏರ್ಪಡಿಸಲಾಯಿತು. ಸ್ತನ್ಯಪಾನ ಮಾಡುವ ತಾಯಂದಿರಲ್ಲಿ ಹಾಲಿನ ಉತ್ಪಾದನೆಯನ್ನು ಹೆಚ್ಚಿಸಲು ಸಹಾಯಕವಾಗುವ ವಿವಿಧ ಪೌಷ್ಟಿಕ ಆಹಾರಗಳನ್ನು ವಿದ್ಯಾರ್ಥಿನಿಯರು ಪ್ರದರ್ಶಿಸಿದರು. ಸ್ಪರ್ಧೆಯ ತೀರ್ಪುಗಾರರಾಗಿ ಎಚ್ಸಿಜಿ ಆಸ್ಪತ್ರೆಯ ಆಹಾರ ತಜ್ಞೆ ಕುಮಾರಿ ಸುಮನ್ ಹಾಗೂ ಮುಖ್ಯ ಅತಿಥಿಗಳಾದ ಡಾ. ಪ್ರೀತಿ ಚಿಂಚೋಳಿ ಕಾರ್ಯನಿರ್ವಹಿಸಿದರು.
ವಿದ್ಯಾರ್ಥಿ ಕಲ್ಯಾಣಾಧಿಕಾರಿ ಶ್ರೀಮತಿ ಶಿವಲೀಲಾ ದೋತ್ರೆ ಅವರು ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದರು. ಈ ಸಂದರ್ಭದಲ್ಲಿ ಡಾ. ಪರ್ವೀನ್ ರಾಜಸಾಬ್, ಡಾ. ಶಿಲ್ಪಾ ಬಂಡ್ರಾಡ್ ಹಾಗೂ ಶ್ರೀಮತಿ ಅಂಬಿಕಾ ಪಾಟೀಲ ಉಪಸ್ಥಿತರಿದ್ದರು.
ಕಾರ್ಯಕ್ರಮವನ್ನು ಕುಮಾರಿ ಸಾರಾ ಅಂಜುಮ್ ನಿರೂಪಿಸಿದರು. ಕೊನೆಯಲ್ಲಿ ಕುಮಾರಿ ಉಮೈಮಾ ಶಫೀನ್ ವಂದನಾರ್ಪಣೆ ಸಲ್ಲಿಸಿದರು.
