ಬಿಪಿಎಲ್ ಕುಟುಂಬಗಳಿಗೆ ಉಚಿತ ಐವಿಎಫ್ ಚಿಕಿತ್ಸೆ: ಸರ್ಕಾರಿ ಯೋಜನೆಯಡಿ ಮಿಲನ್ ಆಸ್ಪತ್ರೆಯಲ್ಲಿ ನಗದುರಹಿತ ಸೇವೆ ಆರಂಭ
kkeditor
ಬಿಪಿಎಲ್ ಕುಟುಂಬಗಳಿಗೆ ಉಚಿತ ಐವಿಎಫ್ ಚಿಕಿತ್ಸೆ: ಸರ್ಕಾರಿ ಯೋಜನೆಯಡಿ ಮಿಲನ್ ಆಸ್ಪತ್ರೆಯಲ್ಲಿ ನಗದುರಹಿತ ಸೇವೆ ಆರಂಭ
ಕಲಬುರಗಿ : ಮಿಲನ್ ಫರ್ಟಿಲಿಟಿ ಅಂಡ್ ಬರ್ಥಿಂಗ್ ಹಾಸ್ಪಿಟಲ್ (Milann – Fertility and Birthing Hospital) ಕರ್ನಾಟಕ ಸರ್ಕಾರದ ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್ (SAST) ಹಾಗೂ ಆಯುಷ್ಮಾನ್ ಭಾರತ್ ಆರೋಗ್ಯ ಕರ್ನಾಟಕ (AB-ArK) ಯೋಜನೆಗಳಡಿ ಮಾನ್ಯತೆ ಪಡೆದು, ಅರ್ಹ ಫಲಾನುಭವಿಗಳಿಗೆ ಸರ್ಕಾರದ ಅನುಮೋದಿತ ಅಸಿಸ್ಟೆಡ್ ರಿಪ್ರೊಡಕ್ಟಿವ್ ಟೆಕ್ನಾಲಜಿ (ART) ಹಾಗೂ ಐವಿಎಫ್ (IVF) ಚಿಕಿತ್ಸೆಯನ್ನು 100% ನಗದುರಹಿತ (Cashless) ಸೇವೆಯಾಗಿ ಆರಂಭಿಸಿದೆ.
ಈ ಯೋಜನೆಯಡಿ ಕರ್ನಾಟಕದ ಬಿಪಿಎಲ್ (BPL) ಪಡಿತರ ಚೀಟಿ ಹೊಂದಿರುವ ಅರ್ಹ ದಂಪತಿಗಳು, ಸರ್ಕಾರದ ಮಾರ್ಗಸೂಚಿಗಳ ಪ್ರಕಾರ ಮಿಲನ್ನ ಆಯ್ದ ಕೇಂದ್ರಗಳಲ್ಲಿ ಉಚಿತ ಐವಿಎಫ್ ಚಿಕಿತ್ಸೆ ಪಡೆಯಬಹುದಾಗಿದೆ. ಚಿಕಿತ್ಸೆ ಪಡೆಯಲು ಸರ್ಕಾರ ನಿಗದಿಪಡಿಸಿರುವ ಅರ್ಹತಾ ಮಾನದಂಡಗಳು, ದಾಖಲಾತಿ ಪರಿಶೀಲನೆ ಹಾಗೂ ಪೂರ್ವಾನುಮತಿ (Pre-Authorisation) ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬೇಕಾಗುತ್ತದೆ.
ಬೆಂಗಳೂರಿನ Milann BACC Healthcare Pvt. Ltd. ಹಾಗೂ Milann Unit of BACC Healthcare Pvt. Ltd. ಆಸ್ಪತ್ರೆಗಳು ಈ ಯೋಜನೆಯಡಿ ಉಚಿತ ಐವಿಎಫ್ ಸೇವೆ ನೀಡಲು ಸರ್ಕಾರದಿಂದ ಅಧಿಕೃತವಾಗಿ ಮಾನ್ಯತೆ ಪಡೆದಿವೆ. ಅಗತ್ಯ ದಾಖಲೆಗಳ ಪರಿಶೀಲನೆ ಮತ್ತು ಅನುಮೋದನೆ ಬಳಿಕ ಅರ್ಹ ಫಲಾನುಭವಿಗಳಿಗೆ ಸೇವೆ ಲಭ್ಯವಾಗಲಿದೆ.
ಯೋಜನೆಯ ಪ್ರಯೋಜನ ಪಡೆಯಲು ಕರ್ನಾಟಕದ ಬಿಪಿಎಲ್ ಪಡಿತರ ಚೀಟಿ, ಆಧಾರ್ ಕಾರ್ಡ್, AB-ArK ಐಡಿ ಸೇರಿದಂತೆ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು. ಅಲ್ಲದೆ, ಸರ್ಕಾರಿ ಆಸ್ಪತ್ರೆ ಅಥವಾ ಸರ್ಕಾರಿ ವೈದ್ಯಕೀಯ ಕಾಲೇಜಿನ ಪ್ರಸೂತಿ ಮತ್ತು ಸ್ತ್ರೀರೋಗ ವಿಭಾಗದ ಮುಖ್ಯಸ್ಥರಿಂದ ನೀಡಲಾದ ಶಿಫಾರಸು ಪತ್ರ ಕಡ್ಡಾಯವಾಗಿದೆ. ಬಳಿಕ ಸರ್ಕಾರದ ಪೋರ್ಟಲ್ ಮೂಲಕ ಪೂರ್ವಾನುಮತಿಗೆ ಅರ್ಜಿ ಸಲ್ಲಿಸಿ ಅನುಮೋದನೆ ಪಡೆದ ನಂತರ ಚಿಕಿತ್ಸೆ ಆರಂಭಿಸಲಾಗುತ್ತದೆ.
ಈ ಕುರಿತು ಮಿಲನ್ ಫರ್ಟಿಲಿಟಿ ಅಂಡ್ ಬರ್ಥಿಂಗ್ ಹಾಸ್ಪಿಟಲ್ನ ನಿರ್ದೇಶಕಿ ಅಂಜಲಿ ಅಜೈಕುಮಾರ್ ಅವರು ಮಾತನಾಡಿ, "ಬಂಜೆತನವು ಇಂದು ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಗುರುತಿಸಲ್ಪಡುತ್ತಿದೆ. ಜಾಗತಿಕವಾಗಿ ಪ್ರತಿ ಆರು ಜನರಲ್ಲಿ ಒಬ್ಬರು ಸಂತಾನೋತ್ಪತ್ತಿ ಸಮಸ್ಯೆಯನ್ನು ಎದುರಿಸುತ್ತಿದ್ದಾರೆ. ಆರ್ಥಿಕವಾಗಿ ದುರ್ಬಲ ಕುಟುಂಬಗಳಿಗೆ ಐವಿಎಫ್ ಚಿಕಿತ್ಸೆಯ ವೆಚ್ಚ ದೊಡ್ಡ ಅಡೆತಡೆಯಾಗಿತ್ತು. ಈಗ SAST ಮತ್ತು AB-ArK ಯೋಜನೆಗಳಡಿ ಅರ್ಹ ಫಲಾನುಭವಿಗಳಿಗೆ ಉಚಿತ ಚಿಕಿತ್ಸೆ ದೊರೆಯುತ್ತಿರುವುದು ಮಹತ್ವದ ಹೆಜ್ಜೆಯಾಗಿದೆ. ಪ್ರತಿಯೊಬ್ಬ ಅರ್ಹ ದಂಪತಿಗೂ ಗುಣಮಟ್ಟದ ಚಿಕಿತ್ಸೆ ಮೂಲಕ ಪೋಷಕರಾಗುವ ಅವಕಾಶ ದೊರೆಯಬೇಕು ಎಂಬುದು ನಮ್ಮ ಆಶಯ" ಎಂದು ಹೇಳಿದರು.
ಯೋಜನೆಯ ಅನುಷ್ಠಾನಕ್ಕಾಗಿ ಮಿಲನ್ ಆಸ್ಪತ್ರೆಯ ಆಡಳಿತ, ಬಿಲ್ಲಿಂಗ್ ಹಾಗೂ ಕಾರ್ಯಾಚರಣೆ ಸಿಬ್ಬಂದಿಗೆ ವಿಶೇಷ ತರಬೇತಿ ನೀಡಲಾಗಿದೆ. ಯೋಜನೆಯಡಿ ಅಗತ್ಯ ದಾಖಲೆಗಳ ನಿರ್ವಹಣೆ, ಪೂರ್ವಾನುಮತಿ ಹಾಗೂ ಕ್ಲೈಮ್ ಪ್ರಕ್ರಿಯೆಗಳನ್ನು ಸರ್ಕಾರದ ನಿಯಮಾನುಸಾರ ಕೈಗೊಳ್ಳಲಾಗುತ್ತದೆ.
ಮಿಲನ್ ಆಸ್ಪತ್ರೆಯ ಗ್ರೂಪ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (COO) ಡಾ. ದೀಪೆನ್ ಶಾ ಮಾತನಾಡಿ, "SAST ಹಾಗೂ AB-ArK ಯೋಜನೆಗಳು ಆರ್ಥಿಕವಾಗಿ ಹಿಂದುಳಿದ ವರ್ಗಗಳಿಗೆ ಉತ್ತಮ ವೈದ್ಯಕೀಯ ಸೇವೆ ತಲುಪಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತಿವೆ. ಈ ಯೋಜನೆಯ ಮೂಲಕ ಅರ್ಹ ದಂಪತಿಗಳು ಪಾರದರ್ಶಕ ಮತ್ತು ನಿಗದಿತ ಪ್ರಕ್ರಿಯೆಯಡಿ ಫಲವತ್ತತೆ ಚಿಕಿತ್ಸೆಯ ಸೌಲಭ್ಯ ಪಡೆಯಬಹುದು" ಎಂದು ಹೇಳಿದರು.
ಸರ್ಕಾರದ ಮಾರ್ಗಸೂಚಿಯಂತೆ, ಈ ಯೋಜನೆಯಡಿ ಪ್ರತಿಯೊಬ್ಬ ಅರ್ಹ ದಂಪತಿಗೆ ಒಮ್ಮೆ ಮಾತ್ರ ಚಿಕಿತ್ಸೆಯ ಪ್ರಯೋಜನ ದೊರೆಯುತ್ತದೆ. ಒಂದು ಫ್ರೆಶ್ ಸೈಕಲ್ ಅಥವಾ ಫ್ರೋಜನ್ ಸೈಕಲ್ ಚಿಕಿತ್ಸೆಗೆ ಮಾತ್ರ ಅನುಮತಿ ಇರುತ್ತದೆ. ಅಂಡಾಣು ಸಂಗ್ರಹಣೆ (Ovum Pick-up) ನಂತರ ಚಿಕಿತ್ಸೆ ಮಧ್ಯದಲ್ಲೇ ಸ್ಥಗಿತಗೊಂಡರೂ ಅದನ್ನು ಬಳಸಿದ ಪ್ರಯೋಜನವೆಂದು ಪರಿಗಣಿಸಲಾಗುತ್ತದೆ. ದಾನಿ ವೀರ್ಯ, ದಾನಿ ಅಂಡಾಣು ಹಾಗೂ ಬಾಡಿಗೆ ತಾಯ್ತನ (Surrogacy) ಸಂಬಂಧಿತ ಚಿಕಿತ್ಸೆಗಳು ಈ ಯೋಜನೆಯ ವ್ಯಾಪ್ತಿಗೆ ಒಳಪಡುವುದಿಲ್ಲ.
ಈ ಯೋಜನೆಯ ಮೂಲಕ ಆರ್ಥಿಕವಾಗಿ ಹಿಂದುಳಿದ ಅರ್ಹ ಕುಟುಂಬಗಳಿಗೆ ಗುಣಮಟ್ಟದ ಸಂತಾನೋತ್ಪತ್ತಿ ಚಿಕಿತ್ಸೆ ಸುಲಭವಾಗಿ ದೊರೆಯುವಂತೆ ಮಾಡುವುದರ ಜೊತೆಗೆ ಕರ್ನಾಟಕದ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಗುರಿಯನ್ನು ಮಿಲನ್ ಆಸ್ಪತ್ರೆ ಹೊಂದಿದೆ.
