ನೆಮ್ಮದಿ ಬೇಕೆಂದರೆ ಮೊದಲು ಮನದೊಳಗೆ, ನಂತರ ಜಗದೊಳಗೆ ಹುಡುಕಿ- ನಗರ ಪೊಲೀಸ್ ಆಯುಕ್ತರಾದ ಡಾ.ಶರಣಪ್ಪ ಢಗೆ ಅಭಿಮತ.
kkeditor
ನೆಮ್ಮದಿ ಬೇಕೆಂದರೆ ಮೊದಲು ಮನದೊಳಗೆ, ನಂತರ ಜಗದೊಳಗೆ ಹುಡುಕಿ- ನಗರ ಪೊಲೀಸ್ ಆಯುಕ್ತರಾದ ಡಾ.ಶರಣಪ್ಪ ಢಗೆ ಅಭಿಮತ.
ತಲೆ ತಗ್ಗಿಸಿ ನಿನ್ನ ಕಾರ್ಯ ನೀನು ಮಾಡಿದರೆ ಅದರ ಪ್ರತಿಫಲ ನಿನ್ನನ್ನು ತಲೆ ಎತ್ತುವಂತೆ ಮಾಡುತ್ತದೆ ಎಂದು ಕಲಬುರಗಿ ನಗರ ಪೊಲೀಸ್ ಆಯುಕ್ತರಾದ ಡಾ. ಶರಣಪ್ಪ ಢಗೆ ಹೇಳಿದರು.
ಕಲಬುರಗಿ ನಗರದ ಶಹಾಬಜಾರದಲ್ಲಿರುವ ಆರಾಧನಾ ಪದವಿ ಪೂರ್ವ ಕಾಲೇಜಿನ ಸಭಾಂಗಣದಲ್ಲಿ ಸ್ನೇಹ ಸಂಗಮ ವಿವಿಧೋದ್ದೇಶ ಸೇವಾ ಸಂಘ ಹಾಗೂ ಆರಾಧನಾ ಸಂಸ್ಥೆಯ ಸಂಯುಕ್ತ ಆಶ್ರಯದಲ್ಲಿ ವಿವಿಧ ಕ್ಷೇತ್ರದ ಸಾಧಕರಿಗೆ ಗೌರವ ಸನ್ಮಾನ ಸಮಾರಂಭ ಉದ್ಘಾಟಿಸಿ ಮಾತನಾಡುತ್ತ ಶ್ರಮದ ಹಾದಿಯಲ್ಲಿ ಯಾವತ್ತೂ ಮೌನವಾಗಿರಬೇಕು, ಏಕೆಂದರೆ ಸದ್ದಿಲ್ಲದೆ ಎಲ್ಲಿ ಪ್ರಯತ್ನದ ಎತ್ತರ ಹೆಚ್ಚಾಗುತ್ತದೆ ಅಲ್ಲಿ ಅದೃಷ್ಟವೂ ತಾನೆ ತಲೆಬಾಗುತ್ತದೆ.ನೆಮ್ಮದಿ ಬೇಕೆಂದರೆ ಹುಡುಕಲೇಬೇಕು ಮೊದಲು ಮನದೊಳಗೆ, ನಂತರ ಜಗದೊಳಗೆ ಅಂದಾಗ ಮಾತ್ರ ಸಂತೃಪ್ತಿ ಜೀವನ ನಮ್ಮದಾಗುತ್ತದೆ. ವಿದ್ಯಾರ್ಥಿಗಳು ತಾಳ್ಮೆಯಿಂದ ಆತ್ಮಸ್ಥೈರದೊಂದಿಗೆ ಸತತ ಪ್ರಯತ್ನ ಮಾಡಿದರೆ ಜೀವನದಲ್ಲಿ ಗೆಲುವು ನಿಮ್ಮದಾಗುತ್ತದೆ. ಸಮಾಜದಲ್ಲಿ ಸನ್ಮಾನಿಸಿಕೊಳ್ಳಬೇಕಾದರೆ ಮೊದಲು ನಾವು ಅನುಮಾನ ಹಾಗೂ ಅವಮಾನದ ಮೆಟ್ಟಿಲು ಹತ್ತಲೇಬೇಕು ಅಂದಾಗ ಮಾತ್ರ ಸನ್ಮಾನ ದೊರೆಯುತ್ತದೆ. ಎಲೆಮರೆ ಕಾಯಿಯಂತೆ ಸಮಾಜ ಸೇವೆ ಮಾಡುತ್ತಿರುವ ಹಲವಾರು ಜನರನ್ನು ಸಮಾಜಕ್ಕೆ ಪರಿಚಯ ಮಾಡುವತಿರುವ ಸಂಘದ ಕಾರ್ಯ ಶ್ಲಾಘನೀಯ ಎಂದು ಮಾರ್ಮಿಕವಾಗಿ ನುಡಿದರು. ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಸಂಘದ ಅಧ್ಯಕ್ಷ ನ್ಯಾಯವಾದಿ ಹಣಮಂತರಾಯ ಎಸ್ ಅಟ್ಟೂರ ಮಾತನಾಡುತ್ತಾ ಸನ್ಮಾನಗಳು ಮುಂದಿನ ಸಮಾಜ ಸೇವೆಗೆ ಪ್ರೇರಣೆಯಾಗುತ್ತವೆ. ಸಮಾಜ ಸೇವಕರನ್ನು ಹಾಗೂ ಹೋರಾಟಗಾರರನ್ನು, ಕಾಯಕ ಜೀವಿಗಳನ್ನು ವಿದ್ಯಾರ್ಥಿಗಳಿಗೆ ಪರಿಚಯ ಮಾಡಿಸುವುದೇ ಕಾರ್ಯಕ್ರಮದ ಮುಖ್ಯ ಉದ್ದೇಶವಾಗಿದೆ. ಅಕ್ಷರದೊಂದಿಗೆ ಸಂಸ್ಕಾರಯುತ ಜೀವನ ಸಾಗಿಸಿದ ವಿದ್ಯಾರ್ಥಿ ರಾಷ್ಟ್ರದ ಆಸ್ತಿ ಯಾಗುತ್ತಾರೆ ಎಂದು ಹೇಳಿದರು. ವೇದಿಕೆಯ ಮೇಲೆ ಗುಲಬರ್ಗಾ ನ್ಯಾಯವಾದಿಗಳ ಸಂಘದ ಅಧ್ಯಕ್ಷರಾದ ಗುಪ್ತಲಿಂಗ ಪಾಟೀಲ, ಕಲಬುರಗಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷರಾದ ಬಾಬುರಾವ ಯಡ್ರಾಮಿ,ಹಿರಿಯ ಸಾಹಿತಿಗಳಾದ ಸ್ವಾಮಿರಾವ ಕುಲಕರ್ಣಿ, ಹಿರಿಯ ಪತ್ರಕರ್ತರು, ಸಾಹಿತಿಗಳಾದ ಮಹಿಪಾಲ ರೆಡ್ಡಿ ಮುನ್ನೂರ, ಆರಾಧನಾ ಪದವಿ ಪೂರ್ವ ಕಾಲೇಜಿನ ಪ್ರಾಂಶುಪಾಲರಾದ ಚೇತನಕುಮಾರ ಗಾಂಗಜಿ ಉಪಸ್ಥಿತರಿದ್ದರು. ಕಾರ್ಯಕ್ರಮದಲ್ಲಿ ಶಿವರುದ್ರ ಕರಿಕಲ್, ರಘುನಂದನ ಕುಲಕರ್ಣಿ, ನ್ಯಾಯವಾದಿ ಅಂಬಾರಾಯ ಪಟ್ಟಣಕರ, ಶ್ರವಣಕುಮಾರ ಮಠ, ಜಗದೀಶ ಸ್ವಾಮಿ, ಶ್ರೀದೇವಿ ಅಟ್ಟೂರ, ಕುಪೇಂದ್ರ ಬಿರಾದಾರ, ಜಗದೇವಿ ಪೂಜಾರಿ, ಸಂಗಮೇಶ ನಾಗೂರ, ಶಿವಶರಣಪ್ಪ ಜಾಂಗೆ ಸೇರಿದಂತೆ ಉಪನ್ಯಾಸಕರು, ವಿದ್ಯಾರ್ಥಿಗಳು ಸೇರಿದಂತೆ ಅನೇಕ ಜನ ಉಪಸ್ಥಿತರಿದ್ದರು. ಇದೆ ಸಂದರ್ಭದಲ್ಲಿ ಗುಲಬರ್ಗಾ ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ಪ್ರಶಸ್ತಿ ಪುರಸ್ಕೃತರಾದ ಹೈಕೋರ್ಟ್ ಹೆಚ್ಚುವರಿ ಅಡ್ವೋಕೇಟ್ ಜನರಲ್ ರಾದ ಡಾ.ಅರ್ಚನಾ ತಿವಾರಿ, ಹೋರಾಟಗಾರರಾದ ಡಾ.ಲಕ್ಷ್ಮಣ ದಸ್ತಿ ಹಾಗೂ ಕರ್ನಾಟಕ ನಾಟಕ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತರಾದ ಸಿದ್ದಲಿಂಗಯ್ಯ ಸ್ವಾಮಿ ಮಲಕೂಡ, ಶ್ರೀಮಂತ ಚಿತ್ರದ ಚಿತ್ರನಟರಾದ ಕ್ರಾಂತಿ ಅವರನ್ನು ವಿಶೇಷವಾಗಿ ಗೌರವಿಸಲಾಯಿತು. ಮಲಕಾರಿ ಪೂಜಾರಿ ಪ್ರಾರ್ಥಿಸಿದರು. ಕಾಶಿನಾಥ ಪಾಟೀಲ ಸ್ವಾಗತಿಸಿದರು. ಡಾ. ಅಂಬಾರಾಯ ಹಾಗರಗಿ ನಿರೂಪಿಸಿ, ವಂದಿಸಿದರು.
ಮಲಕಾರಿ ಪೂಜಾರಿ ಸಂಘದ ಸಹ ಕಾರ್ಯದರ್ಶಿ, 9945571036
