ಕಲಬುರಗಿ ದೂರದರ್ಶನ ಕೇಂದ್ರದ ಸುಧಾರಣೆಗೆ ಪ್ರಾಮಾಣಿಕ ಪ್ರಯತ್ನ: ಭಾಗ್ಯವಾನ್

ಆಕಾಶವಾಣಿಯಲ್ಲಿ ಸಾಹಿತಿ ಕಲಾವಿದರೊಂದಿಗೆ ಸಂವಾದ

ಕಲಬುರಗಿ ದೂರದರ್ಶನ ಕೇಂದ್ರದ ಸುಧಾರಣೆಗೆ ಪ್ರಾಮಾಣಿಕ ಪ್ರಯತ್ನ: ಭಾಗ್ಯವಾನ್

ಕಲಬುರಗಿ : ಇಲ್ಲಿನ ದೂರದರ್ಶನ ಕೇಂದ್ರದ ಸಮಗ್ರ ಸುಧಾರಣೆಗಾಗಿ ಈಗಾಗಲೇ ಉನ್ನತ ಅಧಿಕಾರಿಗಳಿಗೆ ಸೂಕ್ತ ಸಲಹೆ ನೀಡಲಾಗಿದ್ದು ಅಭಿವೃದ್ಧಿಗೆ ಪ್ರಾಮಾಣಿಕ ಪ್ರಯತ್ನ ಮಾಡಲಾಗುತ್ತಿದೆ ಎಂದು ಆಕಾಶವಾಣಿ, ದೂರದರ್ಶನ ದಕ್ಷಿಣ ವಲಯದ ಹೆಚ್ಚುವರಿ ಮಹಾನಿರ್ದೇಶಕರಾದ ಭಾಗ್ಯವಾನ್ ಹೇಳಿದರು.

     ಕಲಬುರಗಿ ಆಕಾಶವಾಣಿ ಕೇಂದ್ರದಲ್ಲಿ ಡಿಸೆಂಬರ್ 12ರಂದು ಕಲಬುರಗಿಯ ಸಾಹಿತಿ, ಕಲಾವಿದರು ಹಾಗೂ ಚಿಂತಕರ ಜೊತೆ ನಡೆಸಿದ ಮುಕ್ತ ಸಂವಾದದಲ್ಲಿ ಮಾತನಾಡಿದ ಅವರು ತಾನು ಕೂಡ ಕಲ್ಯಾಣ ಕರ್ನಾಟಕ ಭಾಗದ ಬೀದರ್ ಜಿಲ್ಲೆಯವನಾಗಿದ್ದು ದೂರದರ್ಶನ ಕೇಂದ್ರದ ಉಳಿವು ಮತ್ತು ಬೆಳವಣಿಗೆಗಾಗಿ ಪ್ರಾಮಾಣಿಕವಾಗಿ ಅನೇಕ ಸಲಹೆಗಳನ್ನು ನೀಡಿದ್ದೇನೆ. ಈಗಾಗಲೇ ಕೆಲವೊಂದು ನೆರವು ನೀಡಲಾಗಿದೆ. ಈ ಕುರಿತಾಗಿ ನಿರ್ಧಾರ ಕೈಗೊಳ್ಳುವವರು ಕೇಂದ್ರ ಸರಕಾರದ ಅಧೀನದಲ್ಲಿ ಬರುವ ಪ್ರಸಾರ ಭಾರತಿ ಆಗಿರುವುದರಿಂದ ಎಲ್ಲಾ ಸಮಸ್ಯೆಗಳನ್ನು ಅವರ ಗಮನಕ್ಕೆ ತರಲಾಗುವುದು. ನಿಮ್ಮ ಎಲ್ಲಾ ಬೇಡಿಕೆಗಳು ಗಮನದಲ್ಲಿದ್ದು ನನ್ನ ಕೈಯಲ್ಲಿ ಏನೂ ಇಲ್ಲ. ತನ್ನ ವ್ಯಾಪ್ತಿ ಮೀರಿದ ಬೇಡಿಕೆಗಳನ್ನು ಉನ್ನತಾಧಿಕಾರಿಗಳ ಗಮನಕ್ಕೆ ತಂದು ಪೂರ್ಣ ಸಹಾಯ ಮಾಡಲಾಗುವುದು ಎಂದರು.

  ಕಲಬುರಗಿ ದೂರದರ್ಶನ ಮತ್ತು ಆಕಾಶವಾಣಿಯು ಈ ಭಾಗದ ಎರಡು ಕಣ್ಣುಗಳಿದ್ದಂತೆ ಸಂಸ್ಕೃತಿ ಪ್ರಸಾರಕ ಸಂಸ್ಥೆಗಳಾಗಿ ಅತ್ಯುನ್ನತ ಕೊಡುಗೆಗಳನ್ನು ನೀಡಿದೆ. ಮಾತ್ರವಲ್ಲದೆ ಈ ಭಾಗದಲ್ಲಿ ಅನೇಕ ಬರಹಗಾರರನ್ನು, ಕತೆಗಾರರನ್ನು, ಸಾಹಿತಿಗಳನ್ನು ನಿರ್ಮಾಣ ಮಾಡಿದೆ. ದೂರದರ್ಶನ ಕೇಂದ್ರವು ಹಳೆಯ ತಾಂತ್ರಿಕ ವ್ಯವಸ್ಥೆಯನ್ನು ಹೊಂದಿರುವ ಕಾರಣ ಉನ್ನತ ದರ್ಜೆಯ ಗುಣಮಟ್ಟದ ಕಾರ್ಯಕ್ರಮ ನಿರ್ಮಾಣ ಕಷ್ಟ ಸಾಧ್ಯವಾಗಿದೆ. ಕೇಂದ್ರವನ್ನು ಅತ್ಯಾಧುನಿಕವಾಗಿ ಅಭಿವೃದ್ಧಿಪಡಿಸುವುದಲ್ಲದೆ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡಿ ಉತ್ತಮ ಮಟ್ಟದ ಕಾರ್ಯಕ್ರಮ ಪ್ರಸಾರ ಮಾಡಲು ಅನುಮಾಡಿ ಕೊಡಬೇಕು. ಗ್ರೇಟೆಡ್ ಕಲಾವಿದರಿಗೆ ಬೆಂಗಳೂರು ಮತ್ತು ಕಲಬುರಗಿಯಲ್ಲಿ ಅವಕಾಶ ಕಲ್ಪಿಸಬೇಕು. ಈಗಾಗಲೇ ವಿಮಾನ ನಿಲ್ದಾಣ ಕಾರ್ಯಾಚರಣೆ ಸ್ಥಗಿತಗೊಂಡಿದ್ದು ದೂರದರ್ಶನ ಕೇಂದ್ರವನ್ನು ಮುಚ್ಚುಗಡೆ ಮಾಡದಂತೆ ಸಾಹಿತಿಗಳು, ಕಲಾವಿದರು ಒಕ್ಕೊರಳಿನಿಂದ ಬೇಡಿಕೆ ಮುಂದಿಟ್ಟರು. ಕೇಂದ್ರ ಸರಕಾರವು ದೂರದರ್ಶನ ಕೇಂದ್ರವನ್ನು ಮುಚ್ಚಲು ಮುಂದಾದರೆ ಬೀದಿಗಿಳಿದು ತೀವ್ರವಾದ ಹೋರಾಟ ಮಾಡಲಾಗುವುದು. ಜಿಲ್ಲೆಯ ಸಚಿವರ ಮನೆಯ ಮುಂದೆ ಘೇರಾವ್ ಹಾಕಿ ಧರಣಿ ಮಾಡಲಾಗುವುದು. ಮುಂದಿನ ಹದಿನೈದು ದಿನಗಳೊಳಗೆ ಸಂಬಂಧಪಟ್ಟ ಇಲಾಖೆಯವರು ಅಭಿವೃದ್ಧಿಯ ಕುರಿತಂತೆ ಸೂಕ್ತ ನಿರ್ಧಾರ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು. 

   ಸಂವಾದ ಕಾರ್ಯಕ್ರಮದಲ್ಲಿ ಸಿ.ಎಸ್ ಮಾಲಿ ಪಾಟೀಲ್, ಶರಣು ಪಪ್ಪಾ, ಡಾ. ಸ್ವಾಮಿ ರಾವ್ ಕುಲಕರ್ಣಿ, ಬಸವರಾಜ್ ಕೊನೇಕ್, ಡಾ. ವಿಶಾಲಕ್ಷಿ ರೆಡ್ಡಿ , ಸುರೇಶ್ ಬಡಿಗೇರ್,ಮಾಲಾ ಕಣ್ಣಿ,ಭೀಮಣ್ಣ ಬೋನಾಳ್, ಮಹಿಪಾಲ ರೆಡ್ಡಿ ಮುನ್ನೂರು, ಪ. ಮನು ಸಗರ್, ಬಾಬುರಾವ್ ಕೋಬಾಳ, ನಾರಾಯಣ ಜೋಶಿ, ಬಸವರಾಜ ನಂದಿಧ್ವಜ ಮತ್ತಿತರ ಅನೇಕ ಗಣ್ಯರು ಉಪಸ್ಥಿತರಿದ್ದರು. ನಿಲಯದ ತಾಂತ್ರಿಕ ವಿಭಾಗದ ಸಹಾಯಕ ನಿರ್ದೇಶಕರಾದ ಗೋಪಾಲ ನಾಯಕ್ ಸ್ವಾಗತಿಸಿದರು. ಕಾರ್ಯಕ್ರಮ ಮುಖ್ಯಸ್ಥರಾದ ಬಿ ಸಿದ್ದಣ್ಣ, ಕಾರ್ಯಕ್ರಮ ನಿರ್ವಹಣಾಧಿಕಾರಿ ಸಂಗಮೇಶ್ ಉದ್ಘೋಷಕರಾದ ಶಾರದಾ ಜಂಬಲದಿನ್ನಿ, ಮಹಮ್ಮದ್ ಅಬ್ದುಲ್ ರವೂಫ್, ಅನುಷಾ, ಜಿ.ವಿ ಕುಲಕರ್ಣಿ ಮತ್ತಿತರರಿದ್ದರು. ಪ್ರಭು ನಿಷ್ಠಿ ಕಾರ್ಯಕ್ರಮ ನಿರೂಪಿಸಿದರು.

   ಕಲಬುರಗಿ ಆಕಾಶವಾಣಿಗೆ ಮೊಟ್ಟ ಮೊದಲ ಬಾರಿಗೆ ಆಗಮಿಸಿದ ಭಾಗ್ಯವಾನ್ ಅವರಿಗೆ ನಿಲಯದ ಪರವಾಗಿ ಎಲ್ಲ ಸಿಬ್ಬಂದಿಗಳು ವಿಶೇಷ ಸನ್ಮಾನವನ್ನು ನೆರವೇರಿಸಿದರು.