ಬಿ.ಎಚ್.ನಿರಗುಡಿ

ಬಿ. ಎಚ್. ನಿರಗುಡಿ

ಕಲ್ಯಾಣ ಕರ್ನಾಟಕ ಯುವ ಪ್ರತಿಭಾವಂತ ಲೇಖಕರೆಂದೇ ಗುರುತಿಸಿಕೊಂಡಿರುವ ಬಿ.ಎಚ್. ನಿರುಗುಡಿಯವರು  ಆಳಂದ ತಾಲೂಕಿನ,ಕವಲಗಾ ಗ್ರಾಮ, ಜೂನ್ ೧.೧೯೭೪ ರಲ್ಲಿ ಕೃಷಿ ಕುಟುಂಬದಲ್ಲಿ ಜನಿಸಿದರು.ಇವರು ಅಪ್ಪಟ ಯುವ ಪ್ರತಿಭಾವಂತ ಯುವಕರಲ್ಲಿ ಒಬ್ಬರಾಗಿದ್ದಾರೆ. ಪ್ರೀತಿ, ವಿನಯ ತೋರುವ ವಿದ್ಯಾರ್ಥಿಗಳ ಹಿತಚಿಂತನ ಮಾಡುವ ಸತ್ಯ ಶಾಂತಿ, ಸಹಿಷ್ಣುತೆಯ ಮಂತ್ರ ಸಾರುವ, ಸೋಲು ಗೆಲುವುಗಳನ್ನು ಮೆಟ್ಟಿ ನಿಲ್ಲುತ್ತ ಎಲ್ಲರನ್ನೂ ನನ್ನವರೆನ್ನುವ ಸ್ವಭಾವ ಇವರದು. ನಿರಗುಡಿಯವರ ಎತ್ತರದ ನಿಲುವು, ಚಿಂತನೆ, ಸಾಹಿತ್ಯ, ಅಧ್ಯಯನ, ಭಾವನೆ, ಬೋಧನೆ, ಪ್ರೀತಿ, ದೃಷ್ಟಿ ಇದ್ದರೂ ಸಾಮಾನ್ಯ ಬದುಕು ಇವರದಾಗಿದೆ. ಯಾವ ಕ್ಷೇತ್ರದಲ್ಲಿ ಬಂದವರೇ ಇರಲಿ, ನಿರುದ್ಯೋಗಿ ಯಾಗಿಯೇ ಇರಲಿ, ವಯಸ್ಸಾದವರೇ ಇರಲಿ, ಸಣ್ಣವರು, ಮಹಿಳೆಯರು, ಯುವಕರು ಪ್ರತಿಯೊಬ್ಬರಿಗೆ ಉತ್ತಮ ಸಲಹೆಯನ್ನು ನೀಡುವ ಯುವ ಉತ್ಸಾಹಿ ಪ್ರತಿಭಾವಂತರಾಗಿದ್ದಾರೆ.

ಇವರು ಬರೆದದ್ದು ಗಟ್ಟಿ ಸಾಹಿತ್ಯ, ಶ್ರೇಷ್ಠ ಸಾಹಿತ್ಯ, ಇವರು ಬರೆದುದ್ದಕ್ಕಿಂತಲೂ ಇನ್ನೊಬ್ಬರಿಗೆ ಸ್ಪೂರ್ತಿ ತುಂಬಿ ಬರೆಯಿಸಿದ್ದೆ ಹೆಚ್ಚು, ನೇರನುಡಿ, ಸರಳ ಜೀವನ, ಬೇರೆಯವರನ್ನು ಕಂಡು ಅನುಕಂಪ ಸಹೃದಯ ಕವಿ, ಚಿಂತಕ, ಸಂಶೋಧಕರಲ್ಲಿ ಇವರೊಬ್ಬರಾಗಿದ್ದಾರೆ. ಇಂದಿನ ಅನೇಕ ಯುವಕರು ಯಾವುದೇ ಕೆಟ್ಟ ಚಟಗಳ ವಸ್ತುಗಳಿಗೆ ಬಲಿಯಾಗುತ್ತಿರುವ ಹೊತ್ತಿನಲ್ಲಿ ಅದನ್ನು ದೂರಿಕರಿಸಿ ಒಬ್ಬ ಸಮಾಜದ ಸೇವಾಕರ್ತರಾಗಿ ಗಮನ ಸೆಳೆದವರು, ಬಿ.ಎಚ್. ನಿರಗುಡಿಯವರು ಎಂದರೆ ತಪ್ಪಾಗಲಾರದು. ಎಂ.ಎ. ಕನ್ನಡ ಪಿ.ಜಿ. ಹಾಗೂ ಎಂ.ಎಡ್ ಪದವಿಧರ, ಉಪನ್ಯಾಸಕ, ಪತ್ರಕರ್ತ, ಪ್ರತಿಭಾವಂತ ಲೇಖಕ ಅದರಂತೆ ಒಬ್ಬ ಮಾನವೀಯ ಮೌಲ್ಯದ ವ್ಯಕ್ತಿಯಾಗಿದ್ದಾರೆ. ರೇಡಿಯೋ ಆಕಾಶವಾಣಿ ಹಾಗೂ ಹಲವು ನಾಡಿನ ವಿವಿಧ ಪತ್ರಿಕೆಗಳಲ್ಲಿ ೨೦೦ಕ್ಕೂ ಹೆಚ್ಚು ಲೇಖನಗಳನ್ನು ಮತ್ತು ಪತ್ರಿಕೆಗಳಲ್ಲಿ ಸಂದರ್ಶನ, ಪುಸ್ತಕ ಪರಿಚಯ ಹಾಗೂ ವಿಮರ್ಶೆ ಮತ್ತು ನಾಟಕ, ಕಾವ್ಯವಾಚನ ಪ್ರಸಾರ ಪ್ರಕಟಗೊಂಡಿವೆ. ಸದಾ ಒಂದಿಲ್ಲೊಂದು ಚಟುವಟಿಕೆಯಲ್ಲಿ ತೊಡಗಿಸಿಕೊಂಡ ನಿಷ್ಟಾವಂತ ವ್ಯಕ್ತಿಯಾಗಿದ್ದಾರೆ. ಜನಪರವಾದ ಸಾಮಾಜಿಕವಾದ, ಶೈಕ್ಷಣಿಕವಾದ ಕೆಲಸ ಕಾರ್ಯಗಳನ್ನು ಕೈಗೊಂಡಿದ್ದಾರೆ.

ಸಸಿ ನೆಡುವುದು, ಪರಿಸರ ಸಂರಕ್ಷಣೆ, ರಕ್ತದಾನ, ಪಲ್ಸ್ ಪೋಲಿಯೋ ಕಾರ್ಯ, ವೈದ್ಯಕೀಯ ತಪಾಸಣೆ, ಸ್ವಚ್ಛ ಕಾರ್ಯ, ವಯಸ್ಕರಿಗೆ ಶಿಕ್ಷಣಾಭ್ಯಾಸ, ಬಡಮಕ್ಕಳಿಗೆ ಉಚಿತ ಬಟ್ಟೆ-ಪುಸ್ತಕ ವಿತರಣೆಯಂತಹ ಕಾರ್ಯ ಯೋಜನೆ ಹಾಕಿಕೊಂಡು ತನ್ನ ಕೈಲಾದ ಮಟ್ಟಿಗೆ ಕೆಲಸ ನಿರ್ವಹಿಸುತ್ತಾ ಬಂದು, ನಿಸ್ವಾರ್ಥ ಸೇವೆಯಲ್ಲಿ ತೊಡಗಿದ ಬಿ.ಎಚ್.ನಿರಗುಡಿ ಹಲವು ಪ್ರತಿಭಾವಂತರಲ್ಲಿ ಒಬ್ಬರು.

ನ್ಯೂ ಜನರಲ ನಾಲೇಜ್, ಹಾಸ್ಯಲಾಸ್ಯ ಪ್ರಥಮ ಚಿಕಿತ್ಸೆ, ಅಭಿಜ್ಞಾನ, ಪ್ರಬಂಧಗಳು, ಕನ್ನಡ ವ್ಯಾಕರಣ, ಸ್ವಾತಂತ್ರ್ಯ ಹೋರಾಟಗಾರರು, ಹಾಸ್ಯಗೊಂಚಲು, ಅಟಲ್ ಬಿಹಾರಿ ವಾಜಪೇಯಿ ಚರಿತ್ರೆ ಹೀಗೆ ಹಲವಾರು ಎಲ್ಲಾ ಜನಸಾಮಾನ್ಯರಿಗೆ ತಿಳಿಯುವ ಕೃತಿಗಳನ್ನು ರಚಿಸಿದ್ದಾರೆ. ಇದರಿಂದ ಎಲ್ಲಾ ಸಾಮಾನ್ಯ ಜನರಿಗೆ ಉಪಯುಕ್ತ ಮಾಹಿತಿ ಸಿಗುತ್ತದೆ. ಎನ್.ಎಸ್.ಎಸ್. ಕಾರ್ಯಕ್ರಮಗಳಲ್ಲಿ ಉಪನ್ಯಾಸ ನೀಡಿದ್ದಾರೆ. ಜೊತೆಗೆ ಜಿಲ್ಲಾ ಯುವ ಸಾಹಿತ್ಯ ವೇದಿಕೆ ಉಪಾಧ್ಯಕ್ಷರಾಗಿ, ಉದಯೋನ್ಮುಖ ಯುವ ಬರಹಗಾರರ ಬಳಗದ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಭಾರತ ಸರಕಾರವು ಇವರಿಗೆ ಜಿಲ್ಲಾ ಯುವ ಪ್ರಶಸ್ತಿ, ಕರುನಾಡ ಚೇತನ ಕಾವ್ಯ ಪ್ರಶಸ್ತಿ, ಸುವರ್ಣ ಕರ್ನಾಟಕ ಪ್ರಶಸ್ತಿ, ಮುಂಡರಗಿ ಭೀಮರಾಯ ವಿಭಾಗಮಟ್ಟದ ಸಾಹಿತ್ಯ ಪ್ರಶಸ್ತಿ, ಕೊಪ್ಪಳ, ಛತ್ರಪತಿ ಶಿವಾಜಿ ಪ್ರಶಸ್ತಿ, ಚುಟುಕು ಪ್ರಶಂಸನಾ ಪ್ರಶಸ್ತಿ, ಮೈಸೂರು, ಮುಂತಾದ ಪ್ರಶಸ್ತಿಗಳು ಲಭಿಸಿವೆ. ಕರ್ನಾಟಕ ಪತಂಜಲಿ ರತ್ನ, ಪ್ರಶಸ್ತಿಯನ್ನು ಮುಖ್ಯಮಂತ್ರಿ ಕುಮಾರ ಸ್ವಾಮಿ ಅವರಿಂದ ಪಡೆದುಕೊಂಡಿದ್ದಾರೆ. ಸ್ನೇಹ ಬಳಗವನ್ನೂ ಹೊಂದಿದ ಬಿ.ಎಚ್.ನಿರಗುಡಿಯವರು ಯುವಕರಿಗೆ ಆದರ್ಶಪ್ರಾಯ ಆಗಿದ್ದಾರೆ.ಕಡುಬಡವ ವಿದ್ಯಾರ್ಥಿಗಳಿಗೆ ಸಹಾಯ ಸಹಕಾರ ನಿರಂತರ, ಸುಮಾರು

20 ವರ್ಷಗಳಿಂದ ಪತ್ರಿಕಾ ಕ್ಷೇತ್ರದಲ್ಲಿ ಕಾರ್ಯ ನಿರ್ವಹಿಸುತ್ತ ಬಂದಿದ್ದಾರೆ. ಜೊತೆಗೆ ಮದರ್ ಥೆರೆಸ್ಸಾ ಕಾಲೇಜಿನ ಕನ್ನಡ ಉಪನ್ಯಾಸಕರಾಗಿ ಸೇವೆ ಸಲ್ಲಿಸಿದ್ದು . ಯುವ ಶಕ್ತಿಯೇ ರಾಷ್ಟ್ರ ಶಕ್ತಿ, ಅಂತಹ ಯುವ ಶಕ್ತಿ, ಸಮಾಜ ಸೇವೆಯಲ್ಲಿ ತನ್ನನ್ನು ತೊಡಗಿಸಿಕೊಂಡಾಗ ಮಾತ್ರ ಭಾರತದ ಭವಿಷ್ಯವನ್ನು ಯುವಕರ ಕಂಗಳಲ್ಲಿ ಕಾಣಲು ಸಾಧ್ಯ. ಪ್ರಸ್ತುತ ಬಿ.ಎಚ್‌.ನಿರಗುಡಿಯವರು ಸತ್ಯಂ ಪದವಿಪೂರ್ವ ಕಾಲೇಜಿನ ಪ್ರಾಚಾರ್ಯರಾಗಿ ಹಾಗೂ ಕರ್ನಾಟಕ ಸರ್ಕಾರದ ಕನ್ನಡ ಪುಸ್ತಕ ಪ್ರಾಧಿಕಾರದ ಸದಸ್ಯರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.