ಲಾಲ್ ಬಹಾದ್ದೂರ್ ಶಾಸ್ತ್ರಿ

ಲಾಲ್ ಬಹಾದ್ದೂರ್ ಶಾಸ್ತ್ರಿ

"ರಾಷ್ಟ್ರ ಕಂಡ ಅಪ್ರತಿಮ ರಾಜಕಾರಣಿ. ಅಪರೂಪದ ನೇತಾರ. ನಿಸ್ವಾರ್ಥಿ ಪ್ರಧಾನಿ, ಮಹಾನ್ ದೇಶಭಕ್ತ ಸೇನಾನಿ ಲಾಲ್ ಬಹದ್ದೂರ್ ಶಾಸ್ತ್ರಿಗಳ ಜನ್ಮದಿನವಿಂದು. ಅಧಿಕಾರದಾಹಿ ನಾಯಕರ ಮೇಲಾಟದಲ್ಲಿ ಮರೆಯಾದ ಅನನ್ಯ ಚೇತನ ಶಾಸ್ತ್ರೀಜಿಯವರು. ಅವರಂತಹ ನಿಸ್ವಾರ್ಥ, ಧೀಮಂತ, ಶ್ರೇಷ್ಟ ವ್ಯಕ್ತಿತ್ವವನ್ನು ದೇಶ ಮತ್ತೆ ಕಾಣಲೇ ಇಲ್ಲ. ಕಾಣುವುದೂ ಇಲ್ಲ. ಏನಂತೀರಾ.?" - ಪ್ರೀತಿಯಿಂದ ಎ.ಎನ್.ರಮೇಶ್. ಗುಬ್ಬಿ.  

ಲಾಲ್ ಬಹದ್ದೂರರು.!

ಇಲ್ಲಿ ಸಕಲರಿಗೂ ಪದವಿ,

ಪಟ್ಟಗಳಿಂದ ಶೋಭೆ.!

ಕೆಲವರಿಂದ ಮಾತ್ರವೇ

ಪದವಿಪಟ್ಟಗಳಿಗೇ ಶೋಭೆ.!

ಅಂತಹವರು ನಮ್ಮಯ

ಲಾಲ್ ಬಹದ್ದೂರರು.!!

ಇಲ್ಲಿ ಸಾಮಾನ್ಯರಿಗೆ ಗದ್ದುಗೆ,

ಅಧಿಕಾರಗಳಿಂದ ಗೌರವ.!

ಧೀಮಂತರಿಂದ ಮಾತ್ರವೇ

ಅಧಿಕಾರ, ಗದ್ದುಗೆಗೇ ಗೌರವ.!

ಅಂತಹವರು ನಮ್ಮಯ

ಹೆಮ್ಮೆಯ ಲಾಲ್‍ಬಹದ್ದೂರರು.!!

ರೈತನ ಬೆವರಿನ ಪಾವಿತ್ರತೆ,

ಯೋಧನ ನೆತ್ತರಿನ ಶ್ರೇಷ್ಟತೆ

ದೇಶಕೆ ಮನದಟ್ಟು ಮಾಡಿಸಿದರು.!

‘ಜೈ ಜವಾನ್, ಜೈ ಕಿಸಾನ್’

ಎಂಬ ಘೋಷಣೆ ಸಾರಿದರು.!

ನಮ್ಮ ಲಾಲ್‍ಬಹದ್ದೂರರು.!!   

ರಾಜಕಾರಣವೆಂದರೆ..

ಹಣ ಮಾಡುವ ಉದ್ಯಮವಲ್ಲ

ನಿಸ್ವಾರ್ಥ ಸೇವಾಕ್ಷೇತ್ರವೆಂದು

ಜಗಕೆಲ್ಲ ತಿಳಿಸಿ ಹೇಳಿದರು.!

ಸಾಧಿಸಿ ಜೀವಿಸಿ ತೋರಿಸಿದರು

ನಮ್ಮ ಲಾಲ್‍ಬಹದ್ದೂರರು.!  

ದೇಶಭಕ್ತಿಯನೇ ಉಸಿರಾಡುತ್ತಾ,

ರಾಷ್ಟ್ರಶಕ್ತಿಗಾಗಿಯೇ ಮಿಡಿಯುತ್ತ,

ಬದುಕಿದ ಮಹಾನ್ ದೇಶಭಕ್ತರು.!

ಸ್ವಾರ್ಥಿ ನಾಯಕರ ಮೆರೆದಾಟದಲ್ಲಿ

ಜನಮಾನಸದಿ ಮಸುಕಾದವರು..

ನಮ್ಮ ಹೆಮ್ಮೆಯ ಲಾಲ್‍ಬಹದ್ದೂರರು.!

ಎ.ಎನ್.ರಮೇಶ್. ಗುಬ್ಬಿ.